ഹരിത കുപ്പിവെള്ളം വിപണിയിലെത്തിക്കാനൊരുങ്ങി സംസ്ഥാന സര്‍ക്കാര്‍
ഹരിത കുപ്പിവെള്ളം വിപണിയിലെത്തിക്കാനൊരുങ്ങി സംസ്ഥാന സര്‍ക്കാര്‍
ഇടുക്കി: പ്ലാസ്റ്റിക്ക് ബോട്ടിലിന് പകരം ജൈവിക രീതിയില്‍ നിര്‍മാര്‍ജനം ചെയ്യാന്‍ സാധിക്കുന്ന ഹരിതകുപ്പികള്‍ (കംപോസ്റ്റബിള്‍ ബോട്ടില്‍) വിപണിയില്‍ എത്തിക്കാനൊരുങ്ങി സര്‍ക്കാര്‍. ജലസേചന വകുപ്പിനുകീഴിലുള്ള കേരള ഇറിഗേഷന്‍ ഇന്‍ഫ്രാസ്ട്രക്ചര്‍ ഡെവലപ്‌മെന്റ് കോര്‍പറേഷനാണ് (കെഐഐഡിസി- കിഡ്ക്) നിര്‍മാണ ചുമതല. സര്‍ക്കാര്‍ പുറത്തിറക്കുന്ന 'ഹില്ലി അക്വാ' ബ്രാന്‍ഡിനുകീഴിലാണ് ഹരിതകുപ്പിവെള്ളവും വിപണിയിലെത്തിക്കുന്നത്. ജലവിഭവ വകുപ്പ് മന്ത്രി റോഷി അഗസ്റ്റിനാണ് പദ്ധതി വിഭാവനം ചെയ്തത്. പദ്ധതി നടപ്പാകുന്നതോടെ രാജ്യത്ത് ആദ്യമായി ജൈവകുപ്പികളില്‍ വെള്ളം വിപണനം ചെയ്യുന്ന സംസ്ഥാനമായി കേരളം മാറും. കാഴ്ചയില്‍ പ്ലാസ്റ്റിക് കുപ്പികളെപോലെ തോന്നിക്കുന്ന ഇവ നൂറുശതമാനവും ജൈവ ഉന്മൂലനം സാധ്യമാകുന്നവയാണ്. ഹരിതകുപ്പികള്‍ നിര്‍മിക്കാന്‍ ഉപയോഗിക്കുന്ന അസംസ്‌കൃത വസ്തുക്കള്‍ക്ക് കേന്ദ്ര മലിനീകരണ നിയന്ത്രണ ബോര്‍ഡിന്റെ അംഗീകാരത്തിനുപുറമെ ഐഎസ്ഒ (ഐഎസ്017088), ടിയുവി തുടങ്ങിയ ദേശീയ, അന്തര്‍ദേശീയ സര്‍ട്ടിഫിക്കേഷനും ലഭിച്ചിട്ടുണ്ട്. കേരളം ആസ്ഥാനമായി പ്രവര്‍ത്തിക്കുന്ന എയ്റ്റ് സ്‌പെഷ്യലിസ്റ്റ് സര്‍വീസസ് എന്ന സ്റ്റാര്‍ട്ടപ്പിന്റെ ഉപവിഭാഗമായ ഗ്രീന്‍ ബയോ പ്രോഡക്ടസാണ് കംപോസ്റ്റബിള്‍ ബോട്ടിലുകള്‍ നിര്‍മിക്കുന്നതിന് ആവിശ്യമായ അസംസ്‌കൃത വസ്തുക്കള്‍ നല്‍കുന്നത്. കംപോസ്റ്റബിള്‍ ബോട്ടിലുകള്‍ക്ക് പ്ലാസ്റ്റിക്ക് കുപ്പിയേക്കാള്‍ നിര്‍മാണ ചെലവ് അധികമായിരിക്കും. പൊതു ഇടങ്ങള്‍, റെയില്‍വേ സ്റ്റേഷനുകള്‍, വിനോദസഞ്ചാര മേഖലകള്‍ എന്നിവ ഉള്‍പ്പടെ സമൂഹത്തിലെ സമസ്ത മേഖലയിലേക്കും ഹരിതകുപ്പിവെള്ളം വിതരണം നടത്താനാണ് ലക്ഷ്യം.
What's Your Reaction?
