ഇടുക്കി: സംഘര്‍ഷാവസ്ഥ കണക്കിലെടുത്ത് പീരുമേട് വില്ലേജിലെ സര്‍വേ നമ്പര്‍ 534, മഞ്ചുമല വില്ലേജിലെ സര്‍വേ നമ്പര്‍ 441, വാഗമണ്‍ വില്ലേജിലെ സര്‍വേ നമ്പര്‍ 724, 813, 896 എന്നിവയില്‍ ഉള്‍പ്പെട്ടുവരുന്ന പ്രദേശങ്ങളില്‍ മെയ് 2 അര്‍ധരാത്രിവരെ കലക്ടര്‍ നിരോധനാജ്ഞ പ്രഖ്യാപിച്ചു. ക്രമസമാധാന നില പരിശോധിക്കാന്‍ പീരുമേട് തഹസില്‍ദാര്‍ സീമ ജോസഫിനെ എക്‌സിക്യൂട്ടീവ് മജിസ്‌ട്രേറ്റായും നിയമിച്ചു. ഈ മേഖലകളിലെ സര്‍ക്കാര്‍ ഭൂമിയില്‍ കൈയേറ്റമോ അനധികൃത നിര്‍മാണങ്ങളോ മറ്റ് നിയമവിരുദ്ധ പ്രവര്‍ത്തനങ്ങളോ നടക്കുന്നില്ലെന്ന് പീരുമേട് തഹസില്‍ദാര്‍, പീരുമേട് ഡിവൈഎസ്പി, ജില്ലാ ജിയോളജിസ്റ്റ്, തദ്ദേശ സ്വയംഭരണ വകുപ്പ് ജോയിന്റ് ഡയറക്ടര്‍ എന്നിവര്‍ ഉറപ്പുവരുത്തണമെന്നും നിയമലംഘനം നടത്തുന്നവര്‍ക്കെതിരെ നിയമ നടപടി സ്വീകരിക്കണമെന്നും കലക്ടറുടെ ഉത്തരവിലുണ്ട്.