ഇടുക്കി: മധ്യവേനല്‍ അവധി അവസാനിക്കാറായതോടെ മൂന്നാറില്‍ സഞ്ചാരികളുടെ വന്‍ തിരക്ക്. ഇതോടെ ഗതാഗതക്കുരുക്കും രൂക്ഷമായി. മൂന്നാര്‍- മാട്ടുപ്പെട്ടി റൂട്ടിലും മൂന്നാര്‍- മറയൂര്‍ റൂട്ടിലും മൂന്നാര്‍ ടൗണിലുമായി നൂറുകണക്കിന് വാഹനങ്ങളാണ് കുരുക്കില്‍പ്പെടുന്നത്. സഞ്ചാരികളായ സ്ത്രീകളും കുട്ടികളുമടക്കമുള്ളവര്‍ ഏറെ ബുദ്ധിമുട്ടുന്നു. മണിക്കൂറുകളോളം ഗതാഗതം തടസപ്പെടുന്നതോടെ വിനോദയാത്ര പാതിവഴിയില്‍ അവസാനിപ്പിച്ച് മടങ്ങുന്നവരും നിരവധി. പ്രദേശവാസികളും ഓട്ടോ-ടാക്സി തൊഴിലാളികളും ദുരിതത്തിലാണ്. ടൗണ്‍ നിശ്ചലമാകുന്നതോടെ ഓട്ടം വിളിച്ചാല്‍ പോകാനാകാത്ത ഗതികേടിലാണ് ടാക്‌സി തൊഴിലാളികള്‍. രോഗികളുമായെത്തിയ ആംബുലന്‍സ് പോലും ഗതാഗതക്കുരുക്കില്‍ അകപ്പെടുന്നു. ഓരോവര്‍ഷവും മൂന്നാറില്‍ എത്തുന്ന സഞ്ചാരികളുടെ എണ്ണത്തില്‍ ക്രമാതീതമായി വര്‍ധിക്കുന്നു. എന്നാല്‍ ഗതാഗതക്കുരുക്കിന് പരിഹാരമുണ്ടാക്കാന്‍ നടപടി ഇല്ല.