ഇടുക്കി: പോത്തിറച്ചിക്ക് വില കുറച്ച് വാര്‍ത്തകളില്‍ ഇടംനേടിയ കട്ടപ്പന നഗരസഭ മീറ്റ് സ്റ്റാള്‍ പൂട്ടി. മലിനീകരണ നിയന്ത്രണ ബോര്‍ഡിന്റെ അനുമതിയില്ലാതെ പ്രവര്‍ത്തിച്ചതിനാലാണ് സ്റ്റാള്‍ പൂട്ടിയത്. വ്യാഴാഴ്ച വൈകിട്ട് മലിനീകരണ നിയന്ത്രണ ബോര്‍ഡ് ജില്ലാ ഓഫീസര്‍ സ്ഥലത്തെത്തി സ്റ്റാള്‍ പൂട്ടണമെന്ന് നിര്‍ദേശം നല്‍കിയിരുന്നു. ഇവിടുന്നുള്ള മലിനജലം കട്ടപ്പനയാറിലേക്ക് ഒഴുക്കുന്നതായി നേരത്തെ ആക്ഷേപമുയര്‍ന്നിരുന്നു. മധ്യകേരളത്തില്‍ ഏറ്റവുമധികം പോത്തിറച്ചി വില്‍പ്പന നടക്കുന്ന ടൗണുകളിലൊന്നാണ് കട്ടപ്പന. പ്രതിദിനം നിരവധിയാളുകളാണ് നഗരസഭയുടെ സ്റ്റാളില്‍ നിന്ന് ഇറച്ചി വാങ്ങുന്നത്.