ഇടുക്കി: സബ്സിഡി വെട്ടിക്കുറച്ച് രാസവളം വല വര്‍ധിപ്പിച്ച മോദി സര്‍ക്കാരിന്റെ കര്‍ഷകദ്രോഹ നയത്തിനെതിരെ കര്‍ഷക സംഘം 15ന് രാവിലെ 10ന് കട്ടപ്പന, തൊടുപുഴ, നെടുങ്കണ്ടം ഹെഡ് പോസ്റ്റ്ഓഫീസ് പടിക്കല്‍ മാര്‍ച്ചും ധര്‍ണയും നടത്തും. കട്ടപ്പനയില്‍ അഖിലേന്ത്യ കിസാന്‍ സഭ ദേശീയ സമിതിയംഗം എം എം മണി എംഎല്‍എ ഉദ്ഘാടനം ചെയ്യും. സംസ്ഥാന വര്‍ക്കിങ് കമ്മിറ്റിയംഗം സി വി വര്‍ഗീസ്, നേതാക്കളായ മാത്യു ജോര്‍ജ്, ബേബി മാത്യു, പി ബി സബീഷ്, സിതാര ജയന്‍ എന്നിവര്‍ സംസാരിക്കും. തൊടുപുഴയില്‍ ജില്ലാ സെക്രട്ടറി റോമിയോ സെബാസ്റ്റ്യന്‍ ഉദ്ഘാടനം ചെയ്യും. പി പി ചന്ദ്രന്‍, മുഹമ്മദ് ഫൈസല്‍, ആശ വര്‍ഗീസ്, പി ഡി സുമോന്‍ എന്നിവര്‍ സംസാരിക്കും. നെടുങ്കണ്ടത്ത് സംസ്ഥാന വൈസ് പ്രസിഡന്റ് എന്‍ വി ബേബി ഉദ്ഘാടനം ചെയ്യും. ടി കെ ഷാജി, പി രവി, കെ ബി വരദരാജന്‍, ജോളി ജോസ് എന്നിവര്‍ സംസാരിക്കും.
രണ്ടുവര്‍ഷത്തിനിടെ വളംസബ്‌സിഡിയില്‍ 84,000 കോടി രൂപയാണ് വെട്ടിക്കുറച്ചതെന്ന് നേതാക്കള്‍ പറഞ്ഞു. 2023- 24ല്‍ സബ്സിഡിക്ക് 2.51 ലക്ഷം കോടി രൂപ ചെലവഴിച്ചപ്പോള്‍ ഇത്തവണ ബജറ്റില്‍ വകയിരുത്തിയത് 1.67 ലക്ഷം കോടി മാത്രം. മിനിമം താങ്ങുവില പോലും നല്‍കാതെയും സബ്സിഡി വെട്ടിക്കുറച്ചും കേന്ദ്രം കര്‍ഷകരെ വഞ്ചിക്കുന്നു. ആവശ്യത്തിന് വളം ലഭ്യത ഉറപ്പുവരുത്താത്തതിനാല്‍ ക്ഷാമത്തിനും വിലക്കയറ്റത്തിനും കാരണമായി. രാസവളത്തിന് കുത്തനെ വില വര്‍ധിപ്പിച്ചതോടെ എല്ലാത്തരം കൃഷികള്‍ക്കും ഉല്‍പാദനച്ചെലവ് വര്‍ധിക്കും. ജിഡിപിയുടെ 19 ശതമാനം സംഭാവന ചെയ്യുന്ന കാര്‍ഷിക മേഖലയെ തകര്‍ക്കാനുള്ള നീക്കമാണിതെന്നും നേതാക്കള്‍ ആരോപിച്ചു. വാര്‍ത്താസമ്മേളനത്തില്‍ മാത്യു ജോര്‍ജ്, കെ എന്‍ വിനീഷ്‌കുമാര്‍, കെ പി സജി, പി പി സുരേഷ് എന്നിവര്‍ പങ്കെടുത്തു.