ഇടുക്കി: ഉപ്പുതറ മൂന്നാം ഡിവിഷനില്‍ യുഡിഎഫ് സ്ഥാനാര്‍ത്ഥി ഡീന്‍ കുര്യാക്കോസിന്റെ പോസ്റ്ററുകളും കൊടി തോരണങ്ങളും നശിപ്പിച്ചതായി പരാതി. സിപിഎമ്മിന്റെയും ഡിവൈഎഫ്‌ഐ യുടെയും പ്രവര്‍ത്തകരാണ് ആക്രമണം നടത്തുന്നതെന്ന് കോണ്‍ഗ്രസ് നേതാക്കള്‍ ആരോപിച്ചു. ചുമരുകളില്‍ ഒട്ടിച്ചിരുന്ന പോസ്റ്ററുകളെല്ലാം കീറി കളഞ്ഞ നിലയിലാണ്. ഒപ്പം വഴിയോരങ്ങളില്‍ സ്ഥാപിച്ചിരുന്ന കൊടി തോരണങ്ങള്‍ എടുത്തുകൊണ്ട് പോവുകയും ചെയ്തു. മേഖലയിലെ ക്രമസമാധാനം തകര്‍ക്കാനുള്ള ഉദ്ദേശത്തോടു കൂടിയാണ് ഇത്തരം പ്രവര്‍ത്തനങ്ങള്‍ നടത്തുന്നത്. സംഭവത്തില്‍ യു ഡി എഫ് പ്രവര്‍ത്തകര്‍ ഉപ്പുതറ പൊലീസില്‍ പരാതി നല്‍കി. ഇതിന്റെ പിന്നില്‍ പ്രവര്‍ത്തിച്ചവരെ കണ്ടെത്തി നടപടി സ്വീകരിക്കണമെന്ന് യുഡിഎഫ് ആവശ്യപ്പെട്ടു.