ഇടുക്കി: മൂന്നാര്‍ ആര്‍ഒ ജങ്ഷനിലെ പാലത്തിലെ കുഴി വാഹനയാത്രികര്‍ക്ക് ഭീഷണിയാകുന്നു. കുഴി രൂപം കൊണ്ടിട്ട് നാളുകളായെങ്കിലും അടയ്ക്കാനുള്ള നടപടി ഉണ്ടായിട്ടില്ല. മഴ പെയ്തതോടെ കുഴിയുടെ വലിപ്പം വര്‍ധിച്ച് മഴ വെള്ളം കെട്ടികിടക്കുന്ന സ്ഥിതിയാണ്. ഭാരമുള്ള വാഹനങ്ങളും ബസുകളുമൊക്കെ കുഴിയില്‍ ചാടുമ്പോള്‍ പാലം കുലുങ്ങുന്നതും ആശങ്ക സ്യഷ്ടിക്കുന്നു. വര്‍ഷങ്ങള്‍ക്ക് മുമ്പ് ബ്രിട്ടിഷുകാരാണ് മുതിരപ്പുഴക്ക് കുറുകെ മൂന്നാറിനെയും മാട്ടുപ്പെട്ടി, ദേവികുളം മേഖലകളെയും ബന്ധിപ്പിക്കുന്ന ഈ ഇരുമ്പുപാലം നിര്‍മിച്ചത്. സൈന്യം നിര്‍മിക്കുന്ന ബെയ്ലി പാലത്തിനു സമാനമായ സാങ്കേതിക വിദ്യയിലാണ് നിര്‍മിതി. മുമ്പ് ഇരുവശങ്ങളിലേക്കും ഇതുവഴി വാഹനങ്ങള്‍ കടന്നുപോയിരുന്നെങ്കിലും പുതിയ പാലം നിര്‍മിച്ചതോടെ ഇരുപാലത്തിലൂടെയുള്ള യാത്ര വണ്‍വെയായി ക്രമീകരിച്ചിരുന്നു. പഴയ പാലത്തിലെ കുഴിയാണിപ്പോള്‍ പരാതികള്‍ക്ക് ഇടവരുത്തിയിട്ടുള്ളത്. കുഴി നികത്താന്‍ അടിയന്തരമായി നടപടി സ്വീകരിക്കണമെന്നാണ് നാട്ടുകാരുടെ ആവശ്യം.