കൊച്ചുതോവാളയില്‍ ജനകീയ സമിതി പ്രതിഷേധയോഗം നടത്തി
കൊച്ചുതോവാളയില്‍ ജനകീയ സമിതി പ്രതിഷേധയോഗം നടത്തി
ഇടുക്കി: കട്ടപ്പന കൊച്ചുതോവാളയില്‍ കഴിഞ്ഞ ദിവസമുണ്ടായ ലഹരി മാഫിയ ഗുണ്ടാ അക്രമണത്തിനെതിരെ കൊച്ചുതോവാള ജനകീയ സമിതി പ്രതിഷേധയോഗം നടത്തി. കട്ടപ്പന നഗരസഭ ചെയര്‍പേഴ്‌സണ്‍ ബീന ടോമി അധ്യക്ഷയായി. നിരവധി ആളുകള്‍ പ്രതിഷേധ യോഗത്തില്‍ പങ്കെടുത്തു. ഒരാഴ്ച മുമ്പാണ് ലഹരി മാഫിയ പ്രദേശത്തെ വീടുകളില്‍ കയറിയും വഴിയില്‍ നിന്നവരെയും യാതൊരു കാരണവുമില്ലാതെ ആക്രമിച്ചത്. സ്ത്രീകള്‍, മുതിര്‍ന്നവര്‍ ഉള്‍പ്പെടെ നിരവധി പേര്‍ക്കാണ് പരിക്കേറ്റത്. അക്രമം നടത്തിയവരെ പൊലീസ് പിടികൂടി റിമാന്‍ഡ് ചെയ്തു. നാളുകളായി മേഖലയില്‍ ലഹരി മാഫിയ സജീവമാണ്. ഇത്തരം ഒരു സംഭവം വീണ്ടും മേഖലയില്‍ ഉണ്ടാകാതിരിക്കാനാണ് ജനകീയ സമിതി രൂപീകരിച്ചിരുന്നത്. ലഹരി മാഫിയയെ മേഖലയില്‍ നിന്നും തുടച്ചുനീക്കുവാനുള്ള ശക്തമായ പ്രതിരോധ പ്രവര്‍ത്തനങ്ങളുമായി മുന്നോട്ടു പോകുവാനാണ് സമിതിയുടെ തീരുമാനം. ലഹരിക്ക് അടിമയായവരെ കണ്ടെത്തി ഡീ അഡിക്ഷന്‍ സെന്ററില്‍ എത്തിക്കാനും യോഗം തീരുമാനിച്ചു. കൊച്ചുതോവാള പള്ളി വികാരി ഫാ. ഇമ്മാനുവല്‍ മടുക്കക്കുഴി, എസ്എന്‍ഡിപി യോഗം സെക്രട്ടറി അഖില്‍ കൃഷ്ണന്‍കുട്ടി, കട്ടപ്പന നഗരസഭ കൗണ്‍സിലര്‍മാരായ സിബി പാറപ്പായില്‍, സുധര്‍മ മോഹനന്‍, കോണ്‍ഗ്രസ് മണ്ഡലം പ്രസിഡന്റ് സിജു ചക്കുംമൂട്ടില്‍, സിപിഎം ഏരിയ കമ്മിറ്റിയംഗം ടോമി ജോര്‍ജ്, ബിജെപി മണ്ഡലം പ്രസിഡന്റ് അഡ്വ. സുജിത്ത് ശശി, അപ്‌കോസ് പ്രസിഡന്റ് ബിനോയ് വെണ്ണിക്കുളം, സിപിഎം ലോക്കല്‍ സെക്രട്ടറി ടിജി എം രാജു, സുരേഷ് ആനിക്കാട് പറമ്പില്‍ എന്നിവര്‍ സംസാരിച്ചു.
What's Your Reaction?
