ചെളിയില്‍ പുതഞ്ഞ് ഇരട്ടയാര്‍ നാല് സെന്റ് നഗറിലെ വീടുകള്‍: നാട്ടുകാര്‍ക്ക് ദുരിതം
ചെളിയില്‍ പുതഞ്ഞ് ഇരട്ടയാര്‍ നാല് സെന്റ് നഗറിലെ വീടുകള്‍: നാട്ടുകാര്‍ക്ക് ദുരിതം
ഇടുക്കി: കനത്തമഴയില്‍ ഇരട്ടയാര്‍ നാല് സെന്റ് നഗറിലെ വീടുകളുടെ പരിസരത്തും റോഡിലും മണ്ണും ചെളിയും അടിഞ്ഞുകൂടിയതോടെ പ്രദേശവാസികള്‍ക്ക് ദുരിതം. ശാന്തിഗ്രാം ഗാന്ധിജി ഇഎം സ്‌കൂളിലെ കെട്ടിട നിര്‍മാണത്തിന്റെ ഭാഗമായി നീക്കിയ മണ്ണാണ് മഴയില്‍ ഇവിടേയ്ക്ക് ഒഴുകിയെത്തിയത്. വീട്ടുമുറ്റത്ത് പാര്‍ക്ക് ചെയ്ത വാഹനങ്ങളും മണ്ണില്‍ പുതഞ്ഞു. നഗറിന്റെ മുകള്‍ഭാഗത്താണ് സ്‌കൂള്‍ സ്ഥിതി ചെയ്യുന്നത്.
കനത്തമഴയില്‍ ഭീമന്‍ മണ്‍കൂന നിരവധി വീടുകളുടെ പരിസരത്തേയ്ക്ക് ഒലിച്ചെത്തി. വീട്ടുമുറ്റങ്ങളില്‍ വന്‍തോതില്‍ ചെളി അടിഞ്ഞുകൂടിയ നിലയിലാണ്. റോഡില്‍ ചെളിനിറഞ്ഞതോടെ ഗതാഗതവും ദുഷ്‌കരമായി. ഉരുള്‍പൊട്ടിയെന്നാണ് ആദ്യം കരുതിയതെന്ന് നാട്ടുകാര്‍ പറഞ്ഞു. വീട്ടുമുറ്റത്ത് പാര്‍ക്ക് ചെയ്തിരുന്ന വാഹനങ്ങളിലും ചെളികയറി. റോഡ് ചെളിക്കുണ്ടായി മാറിയതോടെ നാട്ടുകാര്‍ പ്രതിഷേധവുമായി രംഗത്തെത്തി. വിവരമറിഞ്ഞ് ഇരട്ടയാര്‍ പഞ്ചായത്ത് പ്രസിഡന്റ് ആനന്ദ് സുനില്‍കുമാര്‍, വൈസ് പ്രസിഡന്റ് രജനി സജി, പഞ്ചായത്തംഗം ജോസുകുട്ടി അരീപ്പറമ്പില്‍ എന്നിവര്‍ സ്ഥലം സന്ദര്‍ശിച്ചു. സ്‌കൂള്‍ പരിസരത്ത് കൂടിക്കിടക്കുന്ന മണ്ണ് നീക്കാന്‍ കരാറുകാരന് നിര്‍ദേശം നല്‍കിയതായി ആനന്ദ് സുനില്‍കുമാര്‍ പറഞ്ഞു.
What's Your Reaction?
