ഇടുക്കി: പോക്സോ കേസില്‍ ഒളിവിലായിരുന്ന പ്രതിയെ തമിഴ്നാട്ടില്‍ നിന്ന് പിടികൂടി ഉടുമ്പന്‍ചോല പൊലീസ്. വണ്ടിപ്പെരിയാര്‍ സ്വദേശി പാറയില്‍ രമേശ് ആണ് തിരുപ്പൂരില്‍ നിന്ന് പിടിയിലായത്. ഇയാളെ കട്ടപ്പന പോക്സോ കോടതി 20വര്‍ഷം തടവിന് ശിക്ഷിച്ചിരുന്നു. രണ്ടരവര്‍ഷം ശിക്ഷ അനുഭവിച്ച പ്രതി കഴിഞ്ഞവര്‍ഷം അപ്പീല്‍ ജാമ്യത്തിലിറങ്ങി മുങ്ങുകയായിരുന്നു. ബാംഗ്ലൂരിലായിരുന്ന ഇയാള്‍ കഴിഞ്ഞ മൂന്നുദിവസമായി തിരുപ്പൂരില്‍ ഉള്ളതായി കട്ടപ്പന ഡിവൈഎസ്പി വി എ നിഷാദ്‌മോന്‍ ലഭിച്ച രഹസ്യവിവരത്തിന്റെ അടിസ്ഥാനത്തിലാണ് ഉടുമ്പന്‍ചോല സിഐ പി ഡി അനൂപ്മോന്‍, എസ്ഐ ബിജു ഇമ്മാനുവേല്‍, സിപിഒമാരായ റെക്സ് വി ചെറിയാന്‍, ജോബിന്‍ എന്നിവരുടെ നേതൃത്വത്തിലുള്ള സംഘം തമിഴ്നാട്ടില്‍ എത്തിയത്. തുടര്‍ന്ന് തിരുപ്പൂര്‍ റെയില്‍വേ സ്റ്റേഷന്‍ പരിസരത്തുവെച്ച് പ്രതിയെ ഞായറാഴ്ച അറസ്റ്റ് ചെയ്യുകയുമായിരുന്നു.