ഇടുക്കി: കുഴിത്തൊളു നിരപ്പേല്‍ കടയില്‍ വയോധികനെ ആസിഡ് ഒഴിച്ച് കൊലപ്പെടുത്തിയ പിതൃസഹോദരിയും മരിച്ചു. ഏറ്റുമാനൂര്‍ കാട്ടാച്ചിറ കുറ്റിയാനിയില്‍ തങ്കമ്മയാണ് മരിച്ചത്. ആസിഡ്  ആക്രമണത്തില്‍ തങ്കമ്മയ്ക്കും പരിക്കേറ്റിരുന്നു. കോട്ടയം മെഡിക്കല്‍ കോളേജ് ആശുപത്രിയില്‍ ചികിത്സയിലിരിക്കെയാണ് അന്ത്യം. ഒക്ടോബര്‍ 24നാണ് തങ്കമ്മ സഹോദരന്റെ മകനായ സുകുമാരനെ ആസിഡ് ഒഴിച്ച് കൊലപ്പെടുത്തിയത്. ഇരുവരും തമ്മില്‍ സമ്പത്തിക തര്‍ക്കം നിലനിന്നിരുന്നു. ദിവസങ്ങള്‍ക് മുമ്പ് കുഴിതൊളുവിലെ സുകുമാരന്റെ വീട്ടിലെത്തിയ ഇവര്‍ 24ന് വയോധികന് നേരെ ആസിഡ് ആക്രമണം നടത്തുകയായിരുന്നു. ഇയാളെ അപായപെടുത്താനായി ഏറ്റുമാനൂരില്‍ നിന്നാണ് ഇവര്‍ ആസിഡ് കൊണ്ടു വന്നത്. സുകുമാരന്‍ സംഭവ ദിവസം തന്നെ മരണപ്പെട്ടിരുന്നു. ഇയാളുടെ തലയിലൂടെ ആസിഡ് ഒഴിക്കുന്നതിനിടെ തങ്കമ്മയുടെ ശരീരത്തിലും ആസിഡ് വീഴുകയും പൊള്ളല്‍ ഏല്‍ക്കുകയും ചെയ്തു. തുടര്‍ന്ന് ഇടുക്കി മെഡിക്കല്‍ കോളേജില്‍ ചികിത്സയില്‍ ആയിരുന്ന തങ്കമ്മയെ വിദഗ്ദ്ധ ചികിത്സയ്ക്കായി കോട്ടയം മെഡിക്കല്‍ കോളേജ് ആശുപത്രിയിലേക്ക് മാറ്റിയിരുന്നു.