ഓണ്‍ലൈന്‍ ടാസ്‌ക് നല്‍കി തട്ടിയത് 6.5 ലക്ഷം: പ്രതിയായ മലപ്പുറം സ്വദേശി അറസ്റ്റില്‍
ഓണ്‍ലൈന്‍ ടാസ്‌ക് നല്‍കി തട്ടിയത് 6.5 ലക്ഷം: പ്രതിയായ മലപ്പുറം സ്വദേശി അറസ്റ്റില്‍
ഇടുക്കി: ഓണ്‍ലൈനില്‍ ടാസ്‌കിന്റെ പേരില്‍ കാഞ്ചിയാര്‍ സ്വദേശിയുടെ കൈയില്‍നിന്ന് 6.5 ലക്ഷം രൂപ തട്ടിയ യുവാവ് അറസ്റ്റില്‍. മലപ്പുറം കീഴാറ്റുര്‍ കോലോത്തോടി പ്രണവ് ശങ്കര്‍ (22) ആണ് അറസ്റ്റിലായത്. കാഞ്ചിയാര്‍ സ്വദേശി റിനോയി സെബാസ്റ്റ്യനാണ് പണം നഷ്ടമായത്. ആദ്യഘട്ടത്തില്‍ റിനോയിയുടെ വിശ്വാസം നേടിയെടുത്ത ശേഷം പിന്നീട് വാഗ്ദാനം ചെയ്ത കമ്മിഷനോ മുടക്കിയ പണമോ തിരികെ നല്‍കാതെ കബളിപ്പിക്കുകയായിരുന്നു. റിനോയിയുടെ അക്കൗണ്ടില്‍നിന്ന് വിവിധ സംസ്ഥാനങ്ങളിലുള്ള 7 അക്കൗണ്ടുകളിലാണ് തട്ടിപ്പ് സംഘത്തിന്റെ നിര്‍ദേശപ്രകാരം പണം നിക്ഷേപിച്ചത്. കട്ടപ്പന ഡിവൈഎസ്പി വി എ നിഷാദ്‌മോന് നല്‍കിയ പരാതിയുടെ അടിസ്ഥാനത്തില്‍ ജില്ലാ പൊലീസ് മേധാവി കെ എം സാബു മാത്യുവിന്റെ നിര്‍ദേശപ്രകാരം കട്ടപ്പന എസ്എച്ച്ഒ ടി സി മുരുകന്‍, എഎസ്‌ഐ സതീഷ് കുമാര്‍, സിപിഒ ആര്‍ ഗണേഷ് എന്നിവര്‍ ഉള്‍പ്പെടുന്ന സംഘം രാജസ്ഥാന്‍, അസാം, ജാര്‍ഖണ്ഡ്, ബംഗാള്‍ എന്നിവിടങ്ങളില്‍ അന്വേഷണം നടത്തിയെങ്കിലും വ്യാജ അക്കൗണ്ട് ഉടമകളെ കണ്ടെത്താനായില്ല. തുടര്‍ന്ന് ഇതില്‍ പണം കൈപ്പറ്റിയ ഓണ്‍ലൈന്‍ ടാസ്‌ക് ലെയര്‍ ഒന്നിലെ അക്കൗണ്ട് ഉടമയായ പ്രണവ് ശങ്കറിനെ പ്രതിയാക്കി കേസെടുക്കുകയായിരുന്നു. പ്രതിയെ മലപ്പുറം പാണ്ടിക്കാട് നിന്നാണ് അറസ്റ്റ് ചെയ്തത്. കട്ടപ്പന കോടതിയില്‍ ഹാജരാക്കി റിമാന്‍ഡ് ചെയ്തു.
What's Your Reaction?
