കുമളിയില്‍ പ്ലസ്ടു വിദ്യാര്‍ഥിയെ ഗുരുതര പരിക്കുകളോടെ കണ്ടെത്തി
കുമളിയില്‍ പ്ലസ്ടു വിദ്യാര്‍ഥിയെ ഗുരുതര പരിക്കുകളോടെ കണ്ടെത്തി
ഇടുക്കി: കുമളിയില്‍ സുഹൃത്തുക്കള്‍ക്കൊപ്പം ഫുട്‌ബോള്‍ കളിച്ചശേഷം സ്‌കൂള്‍ കെട്ടിടത്തിലേക്ക് കയറുന്നതിനിടെ ഇരുമ്പുകമ്പി തലയില്‍ പതിച്ച് വിദ്യാര്‍ഥിക്ക് ഗുരുതരമായി പരിക്കേറ്റു. കുമളി ഗവ. ഹയര്‍ സെക്കന്‍ഡറി സ്‌കൂളിലെ പ്ലസ്ടു കൊമേഴ്സ് വിദ്യാര്‍ഥി ശരണിനാണ് പരിക്ക്. ചൊവ്വാഴ്ച വൈകിട്ട് 4 ഓടെയാണ് സംഭവം. പൊലീസിന്റെ പ്രാഥമിക വിവരമനുസരിച്ച് ശരണിന് മുമ്പില്‍ നടന്നിരുന്ന വിദ്യാര്‍ഥി നിലത്ത് കിടന്നിരുന്ന ഇരുമ്പുകമ്പി എടുത്ത് വീശുന്നതിനിടെ അബദ്ധത്തില്‍ ശരണിന്റെ തലയില്‍ പതിക്കുകയായിരുന്നു. തലയ്ക്ക് ആഴത്തില്‍ മുറിവേറ്റ് രക്തം വാര്‍ന്ന നിലയില്‍ കണ്ടതോടെ സുഹൃത്തുക്കള്‍ നിലവിളിച്ച് ആളുകളെ കൂട്ടി. തുടര്‍ന്ന് നാട്ടുകാരും അധ്യാപകരും ചേര്‍ന്ന് വിദ്യാര്‍ഥിയെ കുമളിയിലെ സ്വകാര്യ ആശുപത്രിയിലെത്തിച്ചശേഷം വിദഗ്ധ ചികിത്സയ്ക്കായി പാലായിലെ സ്വകാര്യ ആശുപത്രിയിലേക്ക് മാറ്റി. നിലവില്‍ തീവ്രപരിചരണ വിഭാഗത്തില്‍ ചികിത്സയില്‍ കഴിയുന്ന ശരണിന്റെ ആരോഗ്യനില സംബന്ധിച്ച് കൂടുതല്‍ വിവരങ്ങള്‍ ലഭ്യമായിട്ടില്ല. സംഭവസമയത്ത് ശരണിനൊപ്പമുണ്ടായിരുന്ന സുഹൃത്തുക്കളെ പൊലീസ് ചോദ്യം ചെയ്തുവരികയാണ്. അപകടം അബദ്ധത്തില്‍ സംഭവിച്ചതാണെന്നാണ് പ്രാഥമിക നിഗമനം. എന്നാല്‍ സംഭവത്തില്‍ മറ്റെന്തെങ്കിലും ദുരൂഹതയുണ്ടോയെന്നും പൊലീസ് വിശദമായി അന്വേഷിക്കുന്നുണ്ട്.
സ്ഥലത്ത് വിരലടയാള വിദഗ്ധരും ഡോഗ് സ്‌ക്വാഡും പരിശോധന നടത്തി.
What's Your Reaction?
