ഇടുക്കി: ഇടുക്കിയുടെ കുടിയേറ്റ, കുടിയിറക്ക് ചരിത്രം വിവരിക്കുന്ന, കട്ടപ്പന സ്വദേശി പി.ജെ ജോസഫിന്റെ പുസ്തകം 'കണ്ണകി മുതല്‍ കൊലുമ്പന്‍ വരെ' ഉടന്‍ പുറത്തിറങ്ങും. കണ്ണകിയുടെ കാലഘട്ടം മുതല്‍ കൊലുമ്പന്റെ കാലഘട്ടം വരെ നീളുന്ന ഹൈറേഞ്ചിന്റെയും മലനാടിന്റെ അതിജീവന ചരിത്രവും അയ്യപ്പന്‍കോവില്‍, ഉപ്പുതറ, കോവില്‍മല എന്നിവിടങ്ങളിലെ കുടിയേറ്റവും പുസ്തകത്തില്‍ വിവരിക്കുന്നു.
'ഇളങ്കോ അടികള്‍ ചിലമ്പു നല്‍കി' എന്ന പേരില്‍ ഫെയ്സ്ബുക്കിലെഴുതിയ കുറിപ്പുകളും കുടിയേറ്റ മണ്ണിലെ ആരും പറയാത്ത കഥകളുമാണ് പുസ്തകത്തിലുള്ളത്.
ആദ്യകാല കുടിയേറ്റക്കാരായ
പാലത്തുങ്കല്‍ അന്നമ്മ വര്‍ഗ്ഗീസും കാഞ്ഞിരപാറയില്‍ ശാന്തമ്മ ഉലഹന്നാനും പുസ്തകത്തിന്റെ കവര്‍ പ്രകാശനം നടത്തി. ഹൈറേഞ്ചിലെ പ്രമുഖ വ്യക്തികളും എഴുത്തുകാരും പങ്കെടുത്തു.
മുന്‍ എസ്.പി ജോര്‍ജ് ജോസഫ് മണ്ണുശേരിയുടേതാണ് അവതാരിക. തിരുവിതാംകൂര്‍ ചരിത്രത്തിനൊപ്പം പ്രാധാന്യമുള്ള ഒരു പ്രദേശമായിരുന്നു കോട്ടയം ജില്ലയുടെ ഭാഗമായിരുന്ന ഇടുക്കി. തിരുവിതാംകൂറിന്റെ മാതൃരാജ്യം ഭരിച്ചിരുന്ന ചേരന്മാരുടെ മണ്ഡലസാമ്രാജ്യമായിരുന്ന കാലം മുതല്‍തന്നെ ഈ പ്രദേശം ചരിത്രകാരന്‍മാര്‍ രേഖപ്പെടുത്തിയിട്ടുണ്ട്. എന്നാല്‍ പീരുമേട്, ഉടുമ്പന്‍ചോല താലൂക്കുകളിലെ കുടിയേറ്റ ചരിത്രം ആരും വിശദമായി രേഖപ്പെടുത്തി കാണുന്നില്ല.
ആ കുറവ് പരിഹരിക്കാനുള്ള ശ്രമമാണ് പി.ജെ ജോസഫിന്റെ പുസ്തകമെന്ന് അവതാരികയില്‍ പറയുന്നു. കൈപ്പട പബ്ലിക്കേഷന്‍സാണ് പുസ്തകം പുറത്തിറക്കുന്നത്. ജനുവരിയില്‍ നടക്കുന്ന പ്രകാശന ചടങ്ങില്‍ പ്രമുഖ വ്യക്തികള്‍ പങ്കെടുക്കുമെന്ന് എഴുത്തുകാരന്‍ പറഞ്ഞു.