ഇടുക്കി: കേന്ദ്ര-സംസ്ഥാന സര്‍ക്കാരുകളുടെ ദുര്‍ഭരണത്തിനെതിരെ കെപിസിസി പ്രസിഡന്റ് കെ. സുധാകരനും പ്രതിപക്ഷ നേതാവ് വി.ഡി സതീശനും നയിക്കുന്ന സമരാഗ്‌നി ജനകീയ പ്രക്ഷോഭ യാത്രയ്ക്ക് 21ന് കട്ടപ്പനയില്‍ സ്വീകരണം നല്‍കും. വൈകിട്ട് 4 മുതല്‍ പഴയ ബസ് സ്റ്റാന്‍ഡിലാണ് സമ്മേളനം. ഒരുക്കങ്ങള്‍ പൂര്‍ത്തിയായതായി സ്വാഗതസംഘം ചെയര്‍മാന്‍ ഇ.എം. ആഗസ്തിയും ജനറല്‍ കണ്‍വീനര്‍ ജോയി വെട്ടിക്കുഴിയും വാര്‍ത്താസമ്മേളനത്തില്‍ അറിയിച്ചു. സമ്മേളനത്തില്‍ 15,000 പ്രവര്‍ത്തകര്‍ പങ്കെടുക്കും. പീരുമേട് നിയോജക മണ്ഡലം പൂര്‍ണമായും ഉടുമ്പന്‍ചോല നിയോജക മണ്ഡലത്തിലെ നെടുങ്കണ്ടം ബ്ലോക്കിലെ 6 മണ്ഡലങ്ങളും ഇടുക്കി ബ്ലോക്കിലെ മരിയാപുരം, വാഴത്തോപ്പ് മണ്ഡലങ്ങളും കട്ടപ്പന ബ്ലോക്കിലെ വാത്തിക്കുടി, കാമാക്ഷി, കട്ടപ്പന, കാഞ്ചിയാര്‍ മണ്ഡലങ്ങളിലെ പ്രവര്‍ത്തകരുമാണ് പങ്കെടുക്കുന്നത്.

സമ്മേളത്തിന് മുന്നോടിയായി നഗരത്തിന്റെ 5 കേന്ദ്രങ്ങളില്‍ നിന്ന് പഴയ ബസ് സ്റ്റാന്‍ഡിലേക്ക് പ്രകടനം നടക്കും. പീരുമേട് ബ്ലോക്കിലെ പ്രവര്‍ത്തകര്‍ കട്ടപ്പന പള്ളിക്കവലയില്‍ നിന്നുംഏലപ്പാറ ബ്ലോക്കില്‍ നിന്നുള്ളവര്‍ ഹെഡ് പോസ്റ്റോഫീസ് പടിക്കല്‍ നിന്നും ഇടുക്കി ബ്ലോക്ക് ഇടുക്കിക്കവല പമ്പ് ജങ്ഷനില്‍ നിന്നും കട്ടപ്പന ബ്ലോക്ക് പേഴുംകവല റോഡില്‍ ഹില്‍ടൗണ്‍ ഹോട്ടല്‍ പരിസരത്തു നിന്നും നെടുങ്കണ്ടം ബ്ലോക്ക് പാറക്കടവ് റോഡില്‍ പവിത്ര ജങ്ഷനില്‍ നിന്നും പ്രകടനമായി എത്തിച്ചേരും. വാദ്യമേളങ്ങളും നാടന്‍കലാരൂപങ്ങളും അണിനിരക്കും. ജാഥ ക്യാപ്റ്റന്മാരെ ചെന്നാട്ടുമറ്റം ജങ്ഷനില്‍ നിന്ന് തുറന്ന വാഹനത്തില്‍ സ്വീകരിക്കും. വാര്‍ത്താസമ്മേളനത്തില്‍ തോമസ് രാജന്‍, തോമസ് മൈക്കിള്‍, മനോജ് മുരളി, സിജു ചക്കുംമൂട്ടില്‍, കെ.ജെ. ബെന്നി, ബീന ടോമി, ജോയി ആനിത്തോട്ടം, ജോയി പൊരുന്നോലി എന്നിവരും പങ്കെടുത്തു.