ഇടുക്കി: അന്തരിച്ച നാടകകൃത്തും സംസ്ഥാന പുരസ്‌കാര ജേതാവുമായ കട്ടപ്പന കുമ്പുക്കല്‍ കെ സി ജോര്‍ജിന്റെ സംസ്‌കാരം നടന്നു. സംസ്‌കാരം സംസ്ഥാന സര്‍ക്കാരിന്റെ ഔദ്യോഗിക ബഹുമതികളോടെ. മുഖ്യമന്ത്രിയ്ക്കുവേണ്ടി എഡിഎം ഷൈജു പി ജേക്കബ് വീട്ടിലെത്തി റീത്ത് സമര്‍പ്പിച്ചു. അസുഖബാധിതനായി കട്ടപ്പനയിലെ സ്വകാര്യ ആശുപത്രിയില്‍ ചികിത്സയിലിരിക്കെ തിങ്കളാഴ്ച രാത്രിയാണ് അന്ത്യം. രണ്ടുതവണ മികച്ച നാടകകൃത്തിനുള്ള സംസ്ഥാന സര്‍ക്കാരിന്റെ പുരസ്‌കാരം ലഭിച്ചിട്ടുണ്ട്. 2024ല്‍ കായംകുളം ദേവ കമ്യൂണിക്കേഷന്‍സിന്റെ 'ചന്ദ്രികാവസന്തം' എന്ന നാടകത്തിനും 2010ല്‍ കോഴിക്കോട് സാഗര്‍ കമ്യൂണിക്കേഷന്‍സിന്റെ 'കുമാരന്‍ ഒരു കുടുംബനാഥന്‍' എന്ന നാടകത്തിനുമാണ് അവാര്‍ഡുകള്‍ ലഭിച്ചത്. മന്ത്രി റോഷി അഗസ്റ്റിന്‍, സിപിഎം ജില്ലാ സെക്രട്ടറി സി വി വര്‍ഗീസ്, എഐസിസി അംഗം അഡ്വ. ഇ എം ആഗസ്തി, ബിജെപി ദേശീയ സമിതിയംഗം ശ്രീനഗരി രാജന്‍ തുടങ്ങി വിവിധ സാമൂഹിക, സാംസ്‌കാരിക, ചലച്ചിത്ര മേഖലകളിലെ പ്രമുഖര്‍ അന്ത്യോപചാരമര്‍പ്പിച്ചു.

ബാല്യകാലം മുതല്‍ നാടകരചനയെ ജീവിതസപര്യയാക്കിയ എഴുത്തുകാരന്‍, സംസ്ഥാന സര്‍ക്കാരിന്റെ പ്രൊഫഷണല്‍ നാടക പുരസ്‌കാരം രണ്ടുതവണ ജില്ലയിലെത്തിച്ച കലാകാരന്‍, കെ സി ജോര്‍ജിന്റെ വിയോഗത്തിലൂടെ നഷ്ടമാകുന്നത് നാടക ലോകത്ത് ഇടുക്കിയുടെ പേര് എഴുതിച്ചേര്‍ത്ത പ്രതിഭയെയാണ്.  നാടക രചനയ്‌ക്കൊപ്പം എച്ച്സിഎന്‍ ചാനലില്‍ ലേഖകനായും വാര്‍ത്താ അവതാരകനായും ദീര്‍ഘകാലം പ്രവര്‍ത്തിച്ചിട്ടുണ്ട്.