ഇടുക്കി: കട്ടപ്പനയില്‍ വിദ്യാര്‍ഥിയെ കള്ളക്കേസില്‍ കുടുക്കി അറസ്റ്റ് ചെയ്യുകയും മര്‍ദിക്കുകയും ചെയ്ത സംഭവത്തില്‍ കട്ടപ്പന എസ്‌ഐ എന്‍ ജെ സുനേഖ്, സിപിഒ മനു പി ജോസ് എന്നിവരെ അന്വേഷണ വിധേയമായി സസ്‌പെന്‍ഡ് ചെയ്തു. എറണാകുളം റേഞ്ച് ഡിഐജി പുട്ട വിമലാദിത്യയാണ് നടപടിയെടുത്തത്. അന്വേഷണത്തിന്റെ ഭാഗമായി എന്‍ ജെ സുനേഖിനെ ജില്ലാ പൊലീസ് ആസ്ഥാനത്തേയ്ക്കും മനു പി ജോസിനെ എആര്‍ ക്യാമ്പിലേക്കും മാറ്റി നിര്‍ത്തിയിരിക്കുകയായിരുന്നു. ജില്ലാ ക്രൈംബ്രാഞ്ചിനായിരുന്നു അന്വേഷണച്ചുമതല.

ഏപ്രില്‍ 25ന് ഇരട്ടയാറില്‍ വാഹന പരിശോധനയ്ക്കിടെ യുവാക്കള്‍ ബൈക്കിടിപ്പിച്ച് സിപിഒ മനു പി ജോസിന് പരിക്കേല്‍പ്പിച്ചെന്നായിരുന്നു കേസ്. തുടര്‍ന്ന് പുളിയന്‍മല മടുക്കോലിപ്പറമ്പില്‍ ആസിഫ്, പ്രായപൂര്‍ത്തിയാകാത്ത രണ്ടുപേര്‍ എന്നിവരെ പിടികൂടി. സമയത്ത് സ്ഥലത്ത് ഇല്ലാതിരുന്ന ആസിഫിനെ ഒന്നാം പ്രതിയാക്കിയാണ് കേസെടുത്തത്. പ്രായപൂര്‍ത്തിയാകാത്തവരെ വിട്ടയക്കുകയും ആസിഫിനെ റിമാന്‍ഡ് ചെയ്യുകയും ചെയ്തു. രണ്ട് ബൈക്കുകളിലാണ് ആസിഫും കൂട്ടുകാരുമെത്തിയത്. ആസിഫ് ഓടിച്ച ബൈക്ക് പൊലീസ് വാഹനത്തെ മറികടന്നു പോയി.

പുറകെയെത്തിയ ബൈക്കിലുള്ളയാളെ പിടികൂടാന്‍ പൊലീസ് ജീപ്പ് കുറുകെ നിര്‍ത്തി. ഈ സമയം ബൈക്ക് പൊലീസ് വാഹനത്തിന് സമീപത്തേക്ക് മറിയുകയും ഇറങ്ങിവന്ന മനു റോഡിലേക്ക് വീഴുകയുമായിരുന്നു. ബൈക്കിടിച്ച സംഭവത്തിന് ശേഷം സുഹൃത്തുക്കളെ അന്വേഷിച്ച് എത്തിയപ്പോഴാണ് ആസിഫിനെ പൊലീസ് അറസ്റ്റ് ചെയ്തതെന്നും പൊലീസ് വാഹനത്തിലും സ്റ്റേഷനിലും മര്‍ദിച്ചതായും ചൂണ്ടിക്കാട്ടി യുവാവിന്റെ അമ്മ ഗവര്‍ണര്‍ക്കും മനുഷ്യാവകാശ കമ്മിഷനും സംസ്ഥാന പൊലീസ് മേധാവിക്കും പരാതി നല്‍കിയിരുന്നു.