മൂന്നാര്‍ കെഎസ്ആര്‍ടിസി ഡിപ്പോയില്‍ അടിസ്ഥാന സൗകര്യങ്ങള്‍ വര്‍ധിപ്പിക്കും: മന്ത്രി കെ.ബി ഗണേഷ് കുമാര്‍
മൂന്നാര്‍ കെഎസ്ആര്‍ടിസി ഡിപ്പോയില്‍ അടിസ്ഥാന സൗകര്യങ്ങള്‍ വര്‍ധിപ്പിക്കും: മന്ത്രി കെ.ബി ഗണേഷ് കുമാര്‍
ഇടുക്കി: മൂന്നാര്‍ കെഎസ്ആര്‍ടിസി ഡിപ്പോയില്‍ അടിസ്ഥാന സൗകര്യങ്ങള്‍ വര്‍ധിപ്പിക്കുമെന്ന് ഗതാഗത വകുപ്പ് മന്ത്രി കെ.ബി. ഗണേഷ്‌കുമാര്‍. വ്യത്യസ്തങ്ങളായ വിവിധ ഭക്ഷണ വിഭവങ്ങള്‍ ലഭ്യമാക്കുന്ന വിശാലമായ കഫ്റ്റേരിയ നിര്‍മിക്കും. ഇതിന് സമീപമായി ഇലക്ട്രിക് ചാര്‍ജിങ് സ്റ്റേഷനും സ്ഥാപിക്കും. നിലവില്‍ ഡിപ്പോയ്ക്കുള്ളില്‍ പഴയ ബസുകളില്‍ സഞ്ചാരികള്‍ക്കായി സജ്ജീകരിച്ചിട്ടുള്ള താമസസൗകര്യത്തില്‍ മാറ്റം വരുത്തി എയര്‍ കണ്ടീഷന്‍ ഡോര്‍മെറ്ററികളും മതിയായ ശുചിമുറികളും ഒരുക്കും. പഴയ കെട്ടിടങ്ങള്‍ പൂര്‍ണമായി പൊളിച്ചുമാറ്റുകയും ഇപ്പോഴത്തെ വര്‍ക്ക്‌ഷോപ്പിന്റെ സ്ഥാനം മാറ്റുകയും ചെയ്യുമെന്ന് മന്ത്രി വ്യക്തമാക്കി. ഡിപ്പോയിലെ പഴക്കം ചെന്ന ബസുകള്‍ക്കുപകരം പുതിയ ബസുകള്‍ എത്തിക്കും. വികസന പ്രവര്‍ത്തനങ്ങള്‍ക്കായി സര്‍ക്കാര്‍ അനുവദിച്ചിട്ടുള്ള 5 കോടി രൂപയുടെ നിര്‍മാണ പ്രവര്‍ത്തനങ്ങളും മൂന്നാറില്‍ നടത്തുമെന്ന് മന്ത്രി വ്യക്തമാക്കി. വികസന പ്രവര്‍ത്തനങ്ങളുമായി ബന്ധപ്പെട്ട് ഉദ്യോഗസ്ഥ പ്രതിനിധികള്‍ക്കൊപ്പം മന്ത്രി ഡിപ്പോയുടെ പരിസരപ്രദേശങ്ങള്‍ സന്ദര്‍ശിച്ച് നിര്‍ദ്ദേശങ്ങള്‍ നല്‍കി.
What's Your Reaction?
