ഇടുക്കി: മൂന്നാറിലെ ജനവാസ മേഖലയില്‍ വീണ്ടും കാട്ടുപോത്തിറങ്ങി. മൂന്നാര്‍ ടാറ്റ ടീ ആശുപത്രി ക്വാര്‍ട്ടേഴ്സിന് സമീപമെത്തിയ കാട്ടുപോത്ത് ഏറെ നേരം കഴിഞ്ഞാണ് തിരികെ പോയത്. വനത്തില്‍ തീറ്റയുടെ ലഭ്യത കുറഞ്ഞതോടെ വന്യമൃഗങ്ങള്‍ കൂടുതലായി കാടിറങ്ങുന്ന സ്ഥിതിയാണ്. കാട്ടാനകള്‍ക്ക് പുറമെയാണ് തോട്ടം മേഖലയില്‍ ഭീതിപടര്‍ത്തി കാട്ടുപോത്തിറങ്ങിയത്. ദിവസങ്ങള്‍ക്ക് മുമ്പ് നല്ലതണ്ണി ഐടിഡി മേഖലയില്‍ പകല്‍ സമയത്ത് കാട്ടുപോത്തിറങ്ങിയിരുന്നു. ലയങ്ങള്‍ക്ക് തൊട്ടരികിലൂടെയായിരുന്നു കാട്ടുപോത്തിന്റെ സഞ്ചാരം. നാളുകള്‍ക്ക് മുമ്പ് രണ്ട് തവണ മൂന്നാര്‍ ടൗണില്‍ പകല്‍ സമയം കാട്ടുപോത്തെത്തി. ജനവാസ മേഖലയില്‍ എത്തുന്ന കാട്ടുപോത്ത് ഇതുവരെ ആക്രമണം നടത്താത്ത് ആശ്വാസമാണ്. അപ്രതീക്ഷിതമായി വന്യമൃഗങ്ങള്‍ കാടിറങ്ങിയെത്തുന്നത് തൊഴിലാളി കുടുംബങ്ങളെ ആശങ്കയിലാഴ്ത്തിയിട്ടുണ്ട്. വന്യമൃഗാക്രമണ ഭീഷണി ഭയന്നാണ് തൊഴിലാളികള്‍ ജോലിക്കിറങ്ങുന്നത്.