ഇടുക്കി: അടിമാലി പഞ്ചായത്തിലെ പഴമ്പള്ളിച്ചാല്‍ മേഖലയില്‍ കാട്ടാന ശല്യം രൂക്ഷം. വേനല്‍ കനത്തതോടെ കാട്ടാനകള്‍ ജനവാസ മേഖലയിലേക്ക് കൂടുതലായി ഇറങ്ങുന്ന സ്ഥിതിയുണ്ട്. വീടുകള്‍ക്കരികില്‍ വരെ കാട്ടാനകള്‍ എത്തുന്ന സ്ഥിതിയുണ്ട്. കാടിറങ്ങിയെത്തുന്ന കാട്ടാനകള്‍ പലപ്പോഴും വലിയ തോതില്‍ നാശം വിതച്ചാണ് തിരികെ കാട് കയറുന്നത്. കൃഷി ജോലികള്‍ക്കായി വനാതിര്‍ത്തിയോട് ചേര്‍ന്ന കൃഷിയിടങ്ങളില്‍ കര്‍ഷകരെത്തുന്നത് കാട്ടാനകളെ ഭയന്നാണ്. കാട്ടാനകളെ പ്രതിരോധിക്കാന്‍ നടപ്പാക്കുമെന്നറിയിച്ചിട്ടുള്ള പദ്ധതികളൊന്നും യാഥാര്‍ഥ്യമായിട്ടില്ലെന്നാണ് പ്രദേശവാസികളുടെ പരാതി. ഈ പദ്ധതികള്‍ നടപ്പിലാക്കി പ്രദേശത്തെ കാട്ടാന ശല്യത്തിന് അറുതി വരുത്തണമെന്നാണ് ആവശ്യം.