ഇടുക്കി: ചെങ്കുളം ഓഗ്‌മെന്റേഷന്‍ പദ്ധതിയുടെ നിര്‍മാണം പുനരാരംഭിച്ചു. പദ്ധതിയുമായി ബന്ധപ്പെട്ട ടണല്‍ നിര്‍മാണത്തിന്റെ തുടര്‍ ജോലികളാണ് ആരംഭിച്ചത്. 85 ദശലക്ഷം യൂണിറ്റ് വൈദ്യുതി ഉല്‍പാദനമാണ് കെഎസ്ഇബി ഈ പദ്ധതിയിലൂടെ  ലക്ഷ്യമിടുന്നത്. കല്ലാര്‍ പുഴക്ക് കുറുകെ 80 മീറ്റര്‍ നീളവും 12.50 മീറ്റര്‍ ഉയരവുമുള്ള തടയണ നിര്‍മിക്കും. 3.50 മീറ്റര്‍ വ്യാസമുള്ള ടണലിലൂടെയും 376 മീറ്റര്‍ നീളമുള്ള എക്സിറ്റ് ചാനലിലൂടെയും പുഴയിലെ വെള്ളം ചെങ്കുളം ഡാമിന്റെ റിസര്‍വോയറില്‍ എത്തിക്കും. 6.71 കിലോമീറ്ററോളം ടണല്‍ വഴി ചെങ്കുളം ഡാമില്‍ വെള്ളമെത്തിച്ചാണ് വൈദ്യുതി ഉല്‍പ്പാദിപ്പിക്കുന്നത്. രണ്ടര കിലോമീറ്റര്‍ ടണല്‍ നിര്‍മാണമാണ് പൂര്‍ത്തീകരിക്കാനുള്ളത്. 48 കോടിയാണ് പദ്ധതിയുടെ നിര്‍മാണ ചെലവ്.