ഇടുക്കി: കിഴക്കിന്റെ കാല്‍വരി എന്നറിയപ്പെടുന്ന എഴുകുംവയല്‍ കുരിശുമലയില്‍ തീര്‍ഥാടകരുടെ വന്‍ തിരക്ക്. വലിയനോമ്പിലെ അഞ്ചാമത്തെ വെള്ളിയാഴ്ച ദിനത്തില്‍ രാവിലെ 930ന് മലയടിവാരത്തുള്ള ടൗണ്‍ കപ്പേളയില്‍നിന്ന് കുരിശിന്റെ വഴി ആരംഭിക്കും. തുടര്‍ന്ന്, കുരിശുമലയിലെ തീര്‍ഥാടക പള്ളിയില്‍ വചനപ്രഘോഷണവും ദിവ്യബലിയും നേര്‍ച്ചക്കഞ്ഞി വിതരണവും നടക്കും. വൈകിട്ട് 5നും ദിവ്യബലി നടക്കും. തിരുക്കര്‍മങ്ങള്‍ക്ക് ഫാ. ജോര്‍ജ് തുമ്പനിരപ്പില്‍, ഫാ. വിനോദ് കാനാട്ട് എന്നിവര്‍ നേതൃത്വം നല്‍കും. ഏഷ്യയിലെ ഏറ്റവും വലിയ ക്രൂശിതരൂപവും കേരളത്തില്‍ ആദ്യമായി നിര്‍മിച്ച മിസേറിയ രൂപവും സന്ദര്‍ശിച്ചാണ് തീര്‍ഥാടകര്‍ മടങ്ങുന്നത്.
സംസ്ഥാനത്തിന്റെ വിവിധ സ്ഥലങ്ങളില്‍നിന്നുള്ള വിശ്വാസികള്‍ ഓരോദിവസവും കുരിശുമല കയറാന്‍ എത്തുന്നുണ്ട്. തിരക്ക് കണക്കിലെടുത്ത് രാത്രികാലങ്ങളിലും മലകയറാന്‍ സൗകര്യമുണ്ട്. 11ന് വാഴത്തോപ്പ് സെന്റ് ജോര്‍ജ് കത്തീഡ്രല്‍ പള്ളിയില്‍നിന്ന് ആരംഭിക്കുന്ന ഇടുക്കി രൂപതാ കാല്‍നട തീര്‍ഥാടനത്തിന് മെത്രാന്‍ മാര്‍ ജോണ്‍ നെല്ലിക്കുന്നേല്‍ നേതൃത്വം നല്‍കും. രൂപതയുടെ വിവിധ ഇടവകകളില്‍നിന്നുള്ള വൈദികരുടെ നേതൃത്വത്തില്‍ അരലക്ഷം വിശ്വാസികള്‍ കുരിശുമല ചവിട്ടും.  എന്നാണ് പ്രതീക്ഷിക്കുന്നത്. വെള്ളയാംകുടി, നെടുങ്കണ്ടം, തോപ്രാംകുടി, അടിമാലി മേഖലകളില്‍നിന്ന് വൈദികരുടെ നേതൃത്വത്തില്‍ കുരിശുമലയിലേക്ക് കാല്‍നടയായി വിശ്വാസികള്‍ എത്തും. ദുഃഖവെള്ളി ദിനത്തില്‍ രാവിലെ 6മുതല്‍ കട്ടപ്പനയില്‍നിന്നും 7മുതല്‍ നെടുങ്കണ്ടത്തുനിന്നും കെഎസ്ആര്‍ടിസി, സ്വകാര്യ ബസുകള്‍ കുരിശുമലയിലേക്ക് സര്‍വീസ് നടത്തും. കൂടാതെ ഹൈറേഞ്ചിലെ വിവിധ സ്ഥലങ്ങളില്‍നിന്ന് സ്വകാര്യ ബസുകള്‍ ട്രിപ്പ് നടത്തുമെന്നും ഡയറക്ടര്‍ ഫാ. തോമസ് വട്ടമല, അസിസ്റ്റന്റ് ഡയറക്ടര്‍ ഫാ. ലിബിന്‍ വള്ളിയാംതടം എന്നിവര്‍ അറിയിച്ചു.