ഇടുക്കി: മൂന്നാര്‍ സുബ്രഹ്‌മണ്യസ്വാമി ക്ഷേത്രത്തില്‍ മോഷണം തടയാന്‍ ശ്രമിച്ച സെക്യൂരിറ്റി ജീവനക്കാരനെ തലയ്ക്കടിച്ച് പരിക്കേല്‍പ്പിച്ചയാളെ തമിഴ്‌നാട്ടില്‍നിന്ന് പൊലീസ് പിടികൂടി. മേട്ടുപ്പാളയം ഒട്ടന്‍തുറൈ സ്വദേശി പി സെല്‍വകുമാര്‍(ഗോപാല്‍ - 52 ) ആണ് മേട്ടുപ്പാളയം പൊലീസിന്റെ സഹകരണത്തോടെ മൂന്നാര്‍ പൊലീസ് അറസ്റ്റ് ചെയ്തത്. മാര്‍ച്ച് 14ന് രാത്രിയിലാണ് ക്ഷേത്രത്തില്‍ മോഷണശ്രമം നടന്നത്. സെക്യൂരിറ്റി ജീവനക്കാരന്‍ നല്ലതണ്ണി കല്ലാര്‍ ഫാക്ടറി ഡിവിഷനില്‍ എം മാടസ്വാമിയെ(60)യാണ് സെല്‍വകുമാര്‍ ഇരുമ്പുകമ്പി കൊണ്ട് തലയ്ക്കടിച്ചുപരിക്കേല്‍പ്പിച്ചത്. കിടന്നുറങ്ങുകയായിരുന്ന മറ്റൊരു ജീവനക്കാരനെ മുറിയില്‍ പൂട്ടിയിട്ടശേഷമാണ് മോഷണത്തിന് ശ്രമിച്ചത്. അന്നേദിവസം തന്നെ ഇയാള്‍ സ്ഥലത്തെ ചില വീടുകളിലും മോഷണം നടത്തിയിരുന്നു. എസ്എച്ച്ഒ: രാജന്‍ കെ അരമന, എസ്‌ഐ: അജേഷ് കെ ജോണ്‍ എന്നിവരുടെ  നേതൃത്വത്തിലുള്ള പ്രത്യേക സംഘമാണ് പ്രതിയെ പിടികൂടിയത്.