ഇടുക്കി: ഇരട്ടയാറില്‍ രണ്ട് കരകളെ ബന്ധിപ്പിക്കുന്ന അര നൂറ്റാണ്ടോളം പഴക്കമുള്ള രണ്ട് പാലങ്ങള്‍ നവീകരിക്കാന്‍ നടപടി സ്വീകരിക്കണമെന്ന ആവശ്യം ശക്തമാകുന്നു. അതീവ അപകടാവസ്ഥയിലുള്ള പാലത്തിലൂടെ ജീവന്‍ പണയം വെച്ചാണ് ആളുകളുടെ ഇപ്പോഴത്തെ യാത്ര.പാലം പുനര്‍ നിര്‍മിക്കുമെന്ന് പ്രഖ്യാപനങ്ങള്‍ അനവധി ഉണ്ടായെങ്കിലും ഒന്നും നടപ്പായില്ല. ഇരട്ടയാര്‍ ഡാം കമ്മീഷന്‍ ചെയ്തപ്പോള്‍ ഇരട്ടയാര്‍ ടൗണുമായി ബന്ധപ്പെടുത്തി കെഎസ്ഇബി നിര്‍മിച്ചതാണ് ഇരട്ടയാര്‍ -വലിയതോവാള, ഇരട്ടയാര്‍ - ശാന്തിഗ്രാം എന്നീ പാലങ്ങള്‍. കാലപ്പഴക്കത്തെ തുടര്‍ന്ന് ഇരു പാലങ്ങളുടെയും, പാലങ്ങളുടെ കൈവരികള്‍ തകര്‍ന്ന് ഇരുമ്പുകമ്പികള്‍ തെളിഞ്ഞ് തുരുമ്പെടുത്ത് ദ്രവിച്ച അവസ്ഥയിലാണ് . വീതി കുറഞ്ഞ പാലമായതിനാല്‍ ഒരു സമയം ഒരു വശത്ത് നിന്ന് മാത്രമെ വാഹന ഗതാഗതവും സാധ്യമാകൂ. ഏകദേശം 5 കോടിയിലധികം രൂപയാണ് രണ്ട് പാലങ്ങള്‍ക്കുമായി പ്രഖ്യാപിച്ചത്. ഓരോ തിരഞ്ഞെടുപ്പ് കാലത്തിനും മുന്നോടിയായാണ് ഈ പ്രഖ്യാപനങ്ങള്‍ എല്ലാം ഉണ്ടായത് എന്നതും ശ്രദ്ധേയമാണ്. പ്രഖ്യാപനം നടത്തിയ സ്ഥലം എം.എല്‍ എ യും പൊതുമരാമത്ത് വകുപ്പും പാലങ്ങള്‍ ഉപേക്ഷിച്ച മട്ടാണ്.എം.പി ഫണ്ട് ഉപയോഗിച്ച് പാലങ്ങള്‍ നിര്‍മിക്കാമെങ്കിലും നടപടികള്‍ ഉണ്ടായില്ല. പ്രഖ്യാപിച്ച തുക അടിയന്തരമായ് ഉപയോഗിച്ച് പാലങ്ങള്‍ പുനര്‍ നിര്‍മിക്കണമെന്ന ആവശ്യം ശക്തമാകുകയാണ്.