ഇടുക്കി: ജില്ലാ ലൈബ്രറി കൗണ്‍സില്‍ വികസന സമിതി അടിമാലിയില്‍ നടത്തിയ പുസ്തകോത്സവം സമാപിച്ചു. അടിമാലി ഗവ. ഹൈസ്‌കൂളില്‍ സജ്ജീകരിച്ചിരുന്ന ഇ ജി സത്യന്‍ നഗറിലാണ് കഴിഞ്ഞ മൂന്ന് ദിവസങ്ങളിലായി ജില്ലാ ലൈബ്രറി കൗണ്‍സില്‍ വികസന സമിതിയുടെ നേതൃത്വത്തില്‍ പുസ്തകോത്സവം നടന്നത്. മൂന്ന് ദിവസങ്ങളിലായി നടന്ന പുസ്തകോത്സവത്തില്‍ പ്രതികൂല കാലാവസ്ഥയെ അവഗണിച്ചും നിരവധിയായ പുസ്തക പ്രേമികളും വായനയെ സ്നേഹിക്കുന്നവരും  ഭാഗമായതായി സംഘാടകര്‍ പറഞ്ഞു. ഇടുക്കിയുടെ എഴുത്ത് വഴികള്‍ എന്ന വിഷയത്തില്‍ സെമിനാറും  കോനാട്ട് പബ്ലിക്കേഷന്‍സ് പ്രസിദ്ധീകരിച്ച നാല് പുസ്തകങ്ങളുടെ പ്രകാശനവും നടന്നു. ജില്ലയിലെ സാഹിത്യ, സാംസ്‌കാരിക രംഗത്തെ പ്രമുഖര്‍ പങ്കെടുത്തു. അറുപതിലേറെ സ്റ്റാളുകള്‍ ക്രമീകരിച്ച് സംസ്ഥാനത്തിന്റെ വിവിധ ഭാഗങ്ങളില്‍ നിന്നുള്ള പുസ്തക പ്രസാദകരും പരിപാടിയില്‍ പങ്കെടുത്തു.