ഇടുക്കി: അടിമാലി കുമളി ദേശീയപാതയുടെ ഭാഗമായ കട്ടപ്പന ചെറുതോണി റൂട്ടില്‍ കാണക്കാലിപ്പടിയില്‍ റോഡ്  അപകടാവസ്ഥയില്‍. ഇവിടുത്തെ വളവുകള്‍ ഉയര്‍ത്തുന്ന അപകട ഭീഷണി നാളുകളായി പ്രദേശവാസികള്‍ ചൂണ്ടിക്കാണിക്കുന്നതാണ്. അതോടൊപ്പമാണ് റോഡ് ഇടിഞ്ഞുതാഴാനുള്ള സാധ്യതയും. മണ്‍തിട്ടക്ക് മുകളിലൂടെയാണ് ദേശീയപാത കടന്നുപോകുന്നത്. ബലവത്തായ കല്‍ക്കട്ടോ കലിങ്കോ ഇവിടെയില്ല. കലുങ്ക് ഇല്ലാത്തതിനാല്‍ തന്നെ മുകള്‍ഭാഗത്തെ തിട്ടയില്‍ നിന്നുള്ള മഴവെള്ളമടകം റോഡിലൂടെ ഒഴുകി മണ്‍തിട്ടയില്‍  എത്തും. അവിടെ നിന്ന് 200 അടി താഴ്ചയിലേക്ക് ഒഴുകും. ഇത്തരത്തില്‍ വെള്ളം ഒഴുകി റോഡിന്റെ ഒരുവശത്തെ മണ്ണ് ഒലിച്ചു പോയിട്ടുണ്ട്. മുമ്പ് ഇവിടെ മരങ്ങള്‍ കൂടി നിന്നിരുന്നതിനാല്‍ അപകടാവസ്ഥ തിരിച്ചറിഞ്ഞിരുന്നില്ല. ഇവ വെട്ടിയതോടെയാണ് മേഖലയിലെ അപകടസ്ഥിതി പുറത്തുവന്നത്. രണ്ട് വലിയ വളവുകളാണ് ഇവിടെയുള്ളത്. വലിയ രണ്ട് വാഹനങ്ങള്‍ ഇരുദിശകളില്‍ നിന്ന് വന്നാല്‍  മറികടന്ന് പോകാന്‍ ബുദ്ധിമുട്ട് നേരിടുന്നുണ്ട്. മഴക്കാലത്ത് ചെറിയതോതില്‍ മണ്ണൊലിപ്പും നേരിടുന്നുെവന്ന് നഗരസഭ കൗണ്‍സിലര്‍ പ്രശാന്ത് രാജു പറയുന്നു. എറണാകുളം അടക്കമുള്ള പ്രദേശങ്ങളില്‍ നിന്ന് കട്ടപ്പനയിലേക്ക്  ഭാരവാഹനങ്ങള്‍ അടക്കം ഇതുവഴിയാണ് കടന്നുവരുന്നത്. റോഡ് ഇടിഞ്ഞുതാഴുന്ന സ്ഥിതി ഉണ്ടായാല്‍  വാഹനങ്ങള്‍ 200 അടിയിലധികം താഴ്ചയിലേക്ക് മറിയും. കല്യാണത്തണ്ട് മലനിരകളുടെ ഭാഗമായ മേഖലയില്‍ മഴക്കാലത്ത് മണ്ണിടിച്ചല്‍ ഭീഷണി നേരിടുന്നതാണ്. മേഖലയില്‍ മുമ്പ റോഡിലേക്ക് മണ്ണ് ഇടിഞ്ഞിട്ടുമുണ്ട്. ശക്തമായ മഴയത്ത് മഴവെള്ളം ഒലിച്ചിറങ്ങിയാല്‍ ദേശീയപാത  തകരുന്നതിനൊപ്പം വലിയ അപകടങ്ങള്‍ ഉണ്ടാകും.  നാട്ടുകാര്‍ അടക്കം നിരന്തര പരാതിയാണ് സംഭവത്തില്‍ ഉയര്‍ത്തുന്നത്. അടിമാലി -കുമിളി ദേശീയപാതയുടെ നവീകരണം ഉടന്‍ നടപ്പാകുമെന്ന് അധികൃതര്‍ പറയുമ്പോഴും  നിലവിലെ അപകടസ്ഥിതിക്ക് താല്‍ക്കാലിക പരിഹാരമെങ്കിലും  നടപ്പിലാക്കണമെന്ന ആവശ്യമാണ് ഉയരുന്നത്.