ഇടുക്കി: വെള്ളത്തൂവല്‍ പഞ്ചായത്തിലെ കൈതച്ചാല്‍ മേഖലയില്‍ കാട്ടാന ശല്യം രൂക്ഷം. ജനവാസ മേഖലയില്‍ ഇറങ്ങിയ ഇവറ്റകള്‍ പ്രദേശത്ത് വ്യാപക കൃഷിനാശം വരുത്തി. വനാതിര്‍ത്തിയോട് ചേര്‍ന്ന പട്ടയഭൂമിയാണിവിടം. കായ്ഫലമുള്ള ജാതി, ഏലം, കമുക്, വാഴ തുടങ്ങിയ കാര്‍ഷിവിളകള്‍ നശിപ്പിച്ചു. പ്രദേശത്തെ അഞ്ചോളം കര്‍ഷകരുടെ കൃഷിയിടങ്ങളിലാണ് ആന കൂടുതലായി നാശം വരുത്തിയത്. പ്രദേശത്ത് കിടങ്ങ് തീര്‍ത്ത് കാട്ടാന ശല്യം നിയന്ത്രിക്കണമെന്നാവശ്യപ്പെട്ട് നിരവധി തവണ വനംവകുപ്പിനെ സമീപിച്ചിട്ടും നടപടിയുണ്ടായിട്ടില്ലെന്ന പരാതിയുമുണ്ട്. കാട്ടാന കൃഷിയിടത്തില്‍ നാശം വരുത്തിയതിനെ തുടര്‍ന്ന് പനംകുട്ടി ഡെപ്യൂട്ടി റെയിഞ്ച് ഓഫീസിലെ എസ്എഫ്ഒ ബാബു രാജിന്റെ നേത്വത്തിലുള്ള വനപാലക സംഘം സ്ഥലത്തെത്തി സ്ഥിതിഗതികള്‍ വിലയിരുത്തി. പഞ്ചായത്തംഗം റോയി പാലക്കല്‍, മനുഷ്യ വന്യജീവി സംഘര്‍ഷ ലഘൂകരണ കോര്‍ഡിനേഷനംഗം കെ ബുള്‍ബേന്ദ്രന്‍ എന്നിവരും സ്ഥലത്തെത്തിയിരുന്നു.