ഇടുക്കി: മലയോര ഹൈവേയില്‍ കാഞ്ചിയാര്‍ പാലാക്കടക്ക് സമീപം റോഡിലെ കൊടുംവളവില്‍ അപകടങ്ങള്‍ തുടര്‍ക്കഥയാകുന്നു. കഴിഞ്ഞ രണ്ടാഴ്ചക്കുള്ളില്‍ രണ്ട് അപകടങ്ങളാണ് ഇവിടെയുണ്ടായത്. ഇരുചക്രവാഹനയാത്രികര്‍ അപകടത്തില്‍പെടുന്നതും പരിക്കേല്‍ക്കുന്നതും സ്ഥിരം സംഭവമാണ്.  റോഡ് നിര്‍മാണത്തിലുണ്ടായ അശാസ്ത്രീയതയാണ് അപകടങ്ങള്‍ക്ക് കാരണമെന്ന് നാട്ടുകാര്‍ പറയുന്നു. ഈ റോഡ് മലയോര ഹൈവേയാക്കി നവീകരിക്കുന്നതിന് മുമ്പ് തന്നെ ഈ ഭാഗം അപകട മേഖലയായിരുന്നു. റോഡിന്റെ വളവിന്റെ മധ്യഭാഗത്തുനിന്നാണ് പാലാക്കട പുതിയ പാലം റോഡിലേക്ക് തിരിയുന്നത്.  ഇതുവഴിയും വാഹനങ്ങള്‍ പ്രധാന റോഡിലേക്ക് എത്തുന്നുണ്ട്. വളവിന് ദൈര്‍ഘ്യം കൂടുതലുള്ളതിനാല്‍ ഇരുവശത്തുനിന്ന് വരുന്ന വാഹനങ്ങള്‍ അടുത്ത് എത്തുമ്പോള്‍ മാത്രമേ ഡ്രൈവര്‍മാര്‍ക്ക് ദൃശ്യമാകുകയുള്ളു. ഇതാണ് അപകടങ്ങള്‍ ഉണ്ടാകുന്നതിന്റെ പ്രധാന കാരണം.  റോഡിന്റെ നവീകരണം നടന്ന വേളയില്‍ ഈ വളവ് നേരെയാക്കണമെന്ന് ആവശ്യം ഉയര്‍ന്നിരുന്നു.  എന്നാല്‍ സ്ഥലം ഏറ്റെടുക്കുന്നത് ഉള്‍പ്പെടെയുള്ള വിഷയങ്ങളിലുണ്ടായ തടസങ്ങളാണ് വളവ് നിവര്‍ത്താന്‍ സാധിക്കാതെ പോയതെന്ന് നാട്ടുകാര്‍ പറഞ്ഞു.