.jpeg)
രാജാക്കാട് ജൂബിലി റോഡ് തകര്‍ന്നിട്ട് വര്‍ഷങ്ങള്‍: ഗതാഗതയോഗ്യമാക്കണമെന്ന് നാട്ടുകാര്‍
രാജാക്കാട് ജൂബിലി റോഡ് തകര്‍ന്നിട്ട് വര്‍ഷങ്ങള്‍: ഗതാഗതയോഗ്യമാക്കണമെന്ന് നാട്ടുകാര്‍
ഇടുക്കി: രാജാക്കാട് പഞ്ചായത്ത് പത്താം വാര്‍ഡില്‍ ജൂബിലി റോഡ് തകര്‍ന്നിട്ട് വര്‍ഷങ്ങള്‍ പിന്നിട്ടിട്ടും ഗതാഗതയോഗ്യമക്കാന്‍ നടപടിയില്ലെന്ന് പരാതി. 2021 ലാണ് അവസാനമായി റോഡില്‍ ടാറിങ് ജോലികള്‍ നടത്തി ഏറെ താമസിക്കാതെ തന്നെ ഇത് തകരുകയും ചെയ്തു. രാജാക്കാട് പഞ്ചായത്ത് സുവര്‍ണ്ണ ജൂബിലി സ്മാരകമായിട്ടാണ് റോഡ് നിര്‍മിച്ചത്. ടൗണിലെ ഗതാഗതക്കുരുക്കിന് പരിഹാരം കാണുകയെന്ന ലക്ഷ്യത്തോടെയാണ് രാജാക്കാട് പൊന്മുടി റോഡില്‍ നിന്ന് രാജാക്കാട് എല്ലക്കല്‍ റോഡിലേക്ക് ഒന്നര കിലോമീറ്ററില്‍ താഴെ റോഡ് നിര്‍മിച്ചത്. പാടത്തിന്റെ സമീപത്ത് കൂടി കടന്നുപോകുന്ന റോഡില്‍ പല സ്ഥലങ്ങളിലും വെള്ളക്കെട്ട് രൂപപ്പെടുന്നത് കൊണ്ടാണ് നിര്‍മ്മാണം പൂര്‍ത്തിയാക്കി അധികകാലം കഴിയുന്നതിന് മുമ്പ് റോഡ് തകരുന്നത്. നിരവധി കുടുംബങ്ങള്‍ക്കും, സ്ഥാപനങ്ങള്‍ക്കും ഏക ആശ്രയമായ റോഡ് അടിയന്തിരമായി ടാര്‍ ചെയ്ത് ഗതാഗതയോഗ്യമാക്കാന്‍ നടപടി സ്വീകരിക്കണമെന്നാണ് പ്രദേശവാസികളുടെ ആവശ്യം. റോഡ് നിര്‍മിക്കുന്നതിന് ആവശ്യമായ ഫണ്ട് ഇല്ലെന്നാണ് മെമ്പര്‍ പറയുന്നത്. ഫ്‌ലഡിന്റെയോ, റീബില്‍ഡ് കേരള ഫണ്ട് ഉപയോഗിച്ചോ നിര്‍മാണം നടത്തണമെന്നാവശ്യവുമായി സ്ഥലം എംഎല്‍എയ്ക്കും, ജില്ല പഞ്ചായത്തിനും പ്രദേശവാസികളും പഞ്ചായത്തും വര്‍ഷങ്ങളായി അപേക്ഷ നല്‍കി കാത്തിരിക്കുകയാണ്.
എത്രയും വേഗം റോഡ് ഗതാഗതയോഗ്യമാക്കണമെന്നാണ് നാട്ടുകാരുടെ ആവശ്യം.
What's Your Reaction?
