ഇടുക്കി: വെള്ളക്കയം, കുതിരക്കല്ല്, മഠംപടി എന്നിവിടങ്ങളില്‍ നിര്‍മിക്കുന്ന വെന്റഡ് ക്രോസ് ബാര്‍ കം കോസ് വേയുടെ നിര്‍മാണോദ്ഘാടനം മന്ത്രി റോഷി അഗസ്റ്റിന്‍ നിര്‍വഹിച്ചു. നാടിന്റെ പ്രാദേശിക വിഷയങ്ങള്‍ പ്രത്യേകം പരിഗണിച്ച് പരിഹരിക്കുകയാണ് പ്രധാന ദൗത്യമെന്നും ഡോക്ടേഴ്സ് ക്വാര്‍ട്ടേഴ്സ്, റവന്യൂ ക്വാര്‍ട്ടേഴ്സ്, മെഡിക്കല്‍ കോളേജില്‍ കാര്‍ഡിയാക് യൂണിറ്റ്, ഇറിഗേഷന്‍ ടൂറിസം, മള്‍ട്ടിപ്ലക്സ് തീയറ്റര്‍, നഴ്സിങ് കോളേജ് തുടങ്ങി വികസന പദ്ധതികള്‍ പൂര്‍ത്തിയാക്കി ജില്ലാ ആസ്ഥാനത്ത് ടൗണ്‍ഷിപ്പ് രൂപികരിക്കാനാണ് ലക്ഷ്യം. പദ്ധതികള്‍ പൂര്‍ത്തിയാകുന്നതോടെ ഭാവിയില്‍ വാഴത്തോപ്പ് - മരിയാപുരം പഞ്ചായത്തുകളെ കൂട്ടിച്ചേര്‍ത്ത്  ഇടുക്കി നഗരസഭ രൂപികരിക്കാന്‍ ശ്രമിക്കുന്നതെന്നും മന്ത്രി പറഞ്ഞു. 5.37 കോടി രൂപ ചെലവഴിച്ചാണ് പദ്ധതി നടപ്പാക്കുന്നത്. 185 മീറ്റര്‍ നീളത്തിലാണ് ക്രോസ് വേ നിര്‍മിക്കുന്നത്. വെള്ളക്കയം വെന്റഡ് ക്രോസ് ബാര്‍ കം കോസ് വേയുടെ ആകെ നീളം 325 മീറ്റര്‍ ആണ്. ഇതില്‍ അപ്രോച്ച് റോഡും ഉള്‍പ്പെടുന്നു. മെച്ചപ്പെട്ട ജലവിതരണം, വെള്ളപ്പൊക്ക നിയന്ത്രണം എന്നിവ സുഗമമാക്കുകയാണ് ലക്ഷ്യം. ബോട്ടിങ്, കയാക്കിങ് എന്നിവ ഉള്‍പ്പെടുത്തി വിസിബി കം ഫുട്ട് ബ്രിഡ്ജിന്റെ റിസര്‍വോയറിന് ഒരു സുസ്ഥിര ടൂറിസം പദ്ധതിയായി വികസിപ്പിക്കാനുള്ള സാധ്യതയും പദ്ധതിയിലൂടെ പരിഗണിക്കും. ജില്ലയിലെ 60 ശതമാനം നിര്‍മിതികളും 2018ലെ പ്രളയത്തില്‍ നശിച്ചു. റോഡുകള്‍ പലതും പൂര്‍ണമായി നശിച്ചു. ഇന്ന് ബിഎംബിസി  നിലവാരത്തില്‍ റോഡുകള്‍ പുന:നിര്‍മിക്കാന്‍  കഴിഞ്ഞതായും മന്ത്രി പറഞ്ഞു. കുതിരിക്കല്ല് - തട്ടാംപറമ്പ് റോഡിന് ആസ്തി വികസന ഫണ്ടില്‍ നിന്ന് 20 ലക്ഷം രൂപ അനുവദിച്ചു. ജില്ലാ പഞ്ചായത്ത് പ്രസിഡന്റ് രാരിച്ചന്‍ നീറണാംക്കുന്നേല്‍ അധ്യക്ഷനായി. കെഐഐഡിസി സി.ഇ.ഒ എസ്. തിലകന്‍  പദ്ധതി വിശദീകരിച്ചു. ഇടുക്കി ബ്ലോക്ക് പഞ്ചായത്ത് പ്രസിഡന്റ് ആന്‍സി തോമസ്, മരിയാപുരം പഞ്ചായത്ത് പ്രസിഡന്റ് ജിന്‍സി ജോയ്, ത്രിതല പഞ്ചായത്ത് അംഗങ്ങളായ ആലിസ് വര്‍ഗീസ്, നിമ്മി ജയന്‍, ഫെനില്‍ ജോസ്, മിനി ജേക്കബ്, സാജു പോള്‍, വിനോദ് വര്‍ഗീസ്, രാജു ജോസഫ്, സിന്ധു വിവിധ രാഷ്ട്രീയ നേതാക്കളായ ജോയിച്ചന്‍ ചെറുകുന്നേല്‍,  സുനില്‍ ജേക്കബ്, ജോബി തയ്യില്‍, അനില്‍ കൂവപ്ലാക്കല്‍, സുധാകരന്‍ തണ്ടാടിയില്‍, കുതിരക്കല്ല് സെന്റ് ജൂഡ് പള്ളിവികാരി ഫാ.ജോസഫ് കൊച്ചുകുന്നേല്‍, എസ്എന്‍ഡിപി ശാഖാ പ്രസിഡന്റ് കെ.ജി തങ്കച്ചന്‍, ഇടുക്കി ജയ്മാതാ പ്രൊവിന്‍സ് പ്രൊവിന്‍ഷ്യല്‍ സുപ്പീരിയര്‍ സി. ലിറ്റി ഉപ്പുമാക്കല്‍ എന്നിവര്‍ സംസാരിച്ചു.