ഇടുക്കി: ജില്ലാ പഞ്ചായത്ത് ഡിവിഷനുകളുടെ അതിര്‍ത്തി നിര്‍ണയിച്ച് പുനര്‍വിജ്ഞാപനം പുറത്തിറക്കിയപ്പോള്‍ ഇടുക്കിയില്‍ ഒരു ഡിവിഷന്‍ കൂടി. ഇതോടെ ജില്ലാ പഞ്ചായത്തില്‍ 17 ഡിവിഷനുകളായി. വെള്ളത്തൂവലാണ് പുതിയ ഡിവിഷന്‍. അടിമാലി, ഇടുക്കി ബ്ലോക്ക് ഉള്‍പ്പെടുന്ന വെള്ളത്തുവല്‍ ഡിവിഷനില്‍ 55,101 ആണ് ജനസംഖ്യ. മൂന്നാര്‍, ദേവികുളം, പാമ്പാടുംപാറ ഡിവിഷന്‍ ഒഴികെ മറ്റു ഡിവിഷനുകളില്‍ അതിര്‍ത്തി പുനര്‍നിര്‍ണയം വേണ്ടി വന്നു. ലോറേഞ്ച്, ഹൈറേഞ്ച് എന്ന് തിരിച്ചാണ് ഇത്തവണ പുനര്‍നിര്‍ണയം നടത്തിയത്. അടിമാലി ബ്ലോക്കിലുള്ള വെള്ളത്തുവല്‍, കൊന്നത്തടി, മുനിയറ, കമ്പിളിക്കണ്ടം എന്നിവയും ഇടുക്കി ബ്ലോക്കിലുള്ള പഴയരിക്കണ്ടം, കഞ്ഞിക്കുഴി എന്നിവയുമാണ് വെള്ളത്തൂവല്‍ ഡിവിഷനോട് ചേര്‍ത്തത്. മുരിക്കാശേരി, മുള്ളരിങ്ങാട് എന്നീ ഡിവിഷനുകളുടെ പേരുകള്‍ തോപ്രാംകുടി, വണ്ണപ്പുറം എന്നാക്കി മാറ്റുകയും ചെയ്തു. നെടുങ്കണ്ടം, കട്ടപ്പന ബ്ലോക്കിലെ പാമ്പാടുംപാറ ഡിവിഷനിലാണ് വോട്ടര്‍മാര്‍ കൂടുതലുള്ളത്. 65,619 പേര്‍. പൈനാവ് ഡിവിഷനിലാണ് വോട്ടര്‍മാരുടെ എണ്ണത്തില്‍ ഏറ്റവും കുറവ്. ജില്ലാ ആസ്ഥാനമുള്‍പ്പെടുന്ന മേഖലയില്‍ 53,027 വോട്ടര്‍മാരാണുള്ളത്.