ഇടുക്കി: പുളിയന്‍മല ശിവലിംഗ പളിയകുടിയില്‍ മഴ കാലത്ത് വീടുകള്‍ ചോര്‍ന്നൊലിക്കുന്നു. വര്‍ഷങ്ങള്‍ക്ക് മുമ്പ് ട്രൈബല്‍ ഡിപ്പാര്‍ട്ട്‌മെന്റില്‍ നിന്ന് ലഭിച്ച തുകയും സ്വന്തമായി സ്വരുക്കൂട്ടിയെ തുകയും ഉപയോഗിച്ചാണ് ഇവിടുത്തെ ജനങ്ങള്‍ വീട് നിര്‍മിച്ചത്. എന്നാല്‍ മഴ കാലത്ത് വലിയ തോതില്‍ വീടുകളുടെ വാര്‍ക്ക ചോര്‍ന്നൊലിക്കുന്ന സാഹചര്യമാണ്. വീട്ടുപകരണങ്ങളും കുട്ടികളുടെ പഠനോഉപകരണങ്ങളും നനഞ്ഞു പോകുകയാണ്. ഏകദേശം അമ്പതിനു മുകളില്‍ കുടുംബങ്ങള്‍ താമസിക്കുന്ന ഇവിടെ കൂലിപ്പണിക്കും മറ്റും പോയാണ് ഉപജീവനം നടത്തുന്നത്. പണത്തിന്റെ അപര്യാപ്തതമൂലം ഫലപ്രദമായ രീതിയില്‍ വീട് നിര്‍മാണം സാധിക്കാത്തതാണ് ചോര്‍ച്ചക്ക് കാരണമെന്ന് ഇവര്‍ പറഞ്ഞു. വിഷയം നിരവധി തവണ ട്രൈബല്‍ ഡിപ്പാര്‍ട്ട്‌മെന്റിലും ഊരു കൂട്ടത്തിലും അറിയിച്ചതാണ്. മേല്‍ക്കൂര നിര്‍മിക്കാനുള്ള തുക ഡിപ്പാര്‍ട്ട്‌മെന്റില്‍ ഇല്ലെന്നും ഇത്തരത്തില്‍ നിര്‍മാണ പ്രവര്‍ത്തനങ്ങള്‍ക്കുള്ള നിയമം ഇല്ലെന്നുമാണ് മറുപടി ലഭിച്ചത്. അധികൃതര്‍ ഇടപെട്ട് ഈ പ്രതിസന്ധിക്ക് പരിഹാരം കാണണമെന്നാണ് ഇവരുടെ ആവശ്യം.