ഇടുക്കി:  എം എം മണി എംഎല്‍എയുടെ മകളും സിപിഐ എം രാജാക്കാട് ഏരിയ സെക്രട്ടറിയുമായ  സുമാ സുരേന്ദ്രന് രണ്ട് പഞ്ചായത്തില്‍ വോട്ട്. രാജാക്കാട്, രാജകുമാരി പഞ്ചായത്തുകളിലെ വോട്ടേഴ്‌സ് ലിസ്റ്റിലാണ് സുമ സുരേന്ദ്രന്റെ പേരുള്ളത്. രാജക്കാട് പഞ്ചായത്തിലെ സ്ഥിര താമസക്കാരിയായ സുമയ്ക്ക് അഞ്ചാം വാര്‍ഡിലാണ് വോട്ടുള്ളത്. മുമ്പ് രാജകുമാരി പഞ്ചായത്തിന്റെ ഒന്നാം വാര്‍ഡില്‍നിന്ന് മത്സരിച്ച് പഞ്ചായത്ത് പ്രസിഡന്റാകുകയും ചെയ്തിരുന്നു. ഇപ്പോഴും രാജകുമാരിയിലെ ഒന്നാം വാര്‍ഡിലും വോട്ടുണ്ട്. ഇരട്ടവോട്ട് വിവാദം സംസ്ഥാനത്ത് ആളികത്തുന്നതിനിടെയാണ് സിപിഐഎം വനിതാ നേതാവിനും ഇരട്ട വോട്ട് ഉണ്ടെന്ന് വ്യക്തമാകുന്നത്. രാജകുമാരി പഞ്ചായത്തിലെ വോട്ടര്‍ പട്ടികയില്‍ വ്യാപക ക്രമകേടുണ്ടെന്ന് കോണ്‍ഗ്രസ് ആരോപിച്ചിരുന്നു. അതേ സമയം രാജകുമാരിയില്‍ താമസിച്ചിരുന്ന കാലത്താണ് അവിടെ വോട്ട് ഉണ്ടായിരുന്നതെന്നും താമസം മാറിയതോടെ പേര് നീക്കം ചെയ്യാന്‍ അപേക്ഷ കൊടുത്തിരുന്നെന്നും സുമ സുരേന്ദ്രന്‍ പറഞ്ഞു