ഇടുക്കി: കട്ടപ്പന മാര്‍ക്കറ്റ് കുന്തളംപാറ റോഡിനോടുള്ള അവഗണന അവസാനിപ്പിക്കണമെന്നാവശ്യപ്പെട്ട് ഡ്രൈവര്‍മാരും പ്രദേശവാസികളും ചേര്‍ന്ന് റോഡില്‍ പ്ലാവിന്‍ തൈകള്‍ നട്ട് പ്രതിഷേധിച്ചു. നിരവധി തവണ പിഡബ്ല്യുഡി ഉദ്യോഗസ്ഥരെ വിവരം അറിയിച്ചെങ്കിലും യാതൊരു നടപടിയും സ്വീകരിച്ചിട്ടില്ലെന്നാണ് ഉയരുന്ന ആക്ഷേപം. സ്ത്രീകളും കുട്ടികളുമടക്കം നിരവധി കാല്‍നട യാത്രക്കാരാണ് ഇതുവഴി സഞ്ചരിക്കുന്നത്. കൂടാതെ മഴ പെയ്താല്‍ സമീപത്തെ വ്യാപാര സ്ഥാപനങ്ങളില്‍ വെള്ളം കയറുന്നതും പതിവാണ്. ഞായറാഴ്ചകളില്‍ 100ലേറെ അതിഥി തൊഴിലാളികള്‍ തമ്പടിക്കുന്ന സ്ഥലമാണ് ഇവിടം. 
വാഹനങ്ങള്‍ കടന്നുപോകുമ്പോള്‍ സ്റ്റാന്‍ഡില്‍ കിടക്കുന്ന ഓട്ടോറിക്ഷകളിലെ യാത്രക്കാരുടെയും ഡ്രൈവര്‍മാരുടെയും ദേഹത്ത് ചെളി തെറിക്കുന്നത് ബുദ്ധിമുട്ട് സൃഷ്ടിക്കുന്നുണ്ട്. അടിയന്തരമായി റോഡിന്റെ ശോച്യാവസ്ഥ പരിഹരിച്ചില്ലെങ്കില്‍ വലിയ രീതിയിലുള്ള പ്രതിഷേധ പരിപാടികള്‍ സംഘടിപ്പിക്കുമെന്ന് ഇവര്‍ പറഞ്ഞു.