ഇടുക്കി: അടിമാലി കുമളി ദേശീയപാതയില്‍ കത്തിപ്പാറക്കുസമീപം കൊടുംവളവ് അപകടഭീതി ഉയര്‍ത്തുന്നു. ഇവിടെ നിന്നിരുന്ന മരങ്ങള്‍ കൃഷി ആവശ്യത്തിനായി നാളുകള്‍ക്ക് മുമ്പ് മുറിച്ചുമാറ്റിയതോടെയാണ് കൂടുതല്‍ വളവ് രൂപപ്പെട്ടത്. വാഹനങ്ങള്‍ ഇവിടെ അപകടത്തില്‍പ്പെട്ടാല്‍ കൊക്കയിലേക്ക് പതിക്കും. കഴിഞ്ഞ ദിവസം താഴ്ച്ചയിലേക്ക് പതിച്ച കാര്‍യാത്രികര്‍ അത്ഭുതകരമായാണ് രക്ഷപ്പെട്ടത്. ബിഎംബിസി നിലവാരത്തില്‍ ടാറിങ് ജോലികള്‍ നടന്നതിനാല്‍ വലിയ വേഗത്തിലാണ് വാഹനങ്ങള്‍ കടന്നുപോകുന്നത്. എന്നാല്‍ വേണ്ടത്ര വീതിയില്ലാത്തതും അപകട സാധ്യത വര്‍ധിപ്പിക്കുന്നു. അപകടങ്ങള്‍ പതിവായ സാഹചര്യത്തില്‍ ഇവിടെ സുരക്ഷാവേലി സ്ഥാപിക്കണമെന്ന ആവശ്യം ഉയര്‍ന്നിട്ടുള്ളത്.