കുമളിക്കാര്‍ നടന്നു; നാലര കിലോമീറ്റര്‍
കുമളിക്കാര്‍ നടന്നു; നാലര കിലോമീറ്റര്‍
ഇടുക്കി: ലഹരി വിരുദ്ധ ബോധവല്‍ക്കരണത്തിന്റെ ഭാഗമായി സീനിയര്‍ ചേംബര്‍ ഇന്റര്‍നാഷണല്‍ തേക്കടി ലീജിയണ്‍ കുമളിയില്‍ അഖില കേരള വയോജന നടത്ത മത്സരം സംഘടിപ്പിച്ചു. കുമളി എസ്‌ഐ ലിജോ പി മണി ഫ്‌ളാഗ് ഓഫ് ചെയ്തു. നാലര കിലോമീറ്റര്‍ നടത്ത മത്സരത്തില്‍ നിരവധി പേര്‍ പങ്കെടുത്തു. പഞ്ചായത്ത് പൊതുവേദിയില്‍ നിന്നാരംഭിച്ച മത്സരം ചെളിമട ചുറ്റി ഒന്നാം മൈല്‍ വഴി കുമളിയില്‍ സമാപിച്ചു. വാഴൂര്‍ സോമന്‍ എംഎല്‍എ മുഖ്യപ്രഭാഷണം നടത്തി സമ്മാനദാനം നിര്‍വ്വഹിച്ചു. വിജയികള്‍ക്ക് ക്യാഷ് അവാര്‍ഡും ട്രോഫിയും വനിതകള്‍ക്ക് പ്രത്യേക സമ്മാനവും വിതരണം ചെയ്തു. മണപ്പുറം യൂണിക് ടൈംസ് മിന്നലെ മീഡിയാ അവാര്‍ഡ് കരസ്ഥമാക്കിയ ഏഷ്യാനെറ് ലേഖകന്‍ കെ വി സന്തോഷ്‌കുമാര്‍, വിവിധ സന്നദ്ധ സേവന പ്രവര്‍ത്തനങ്ങള്‍ നടത്തുന്ന ക്രോസ് സംഘടനയുടെ പ്രസിഡന്റ് ഷാജി അറയ്ക്കല്‍, സഹപ്രവര്‍ത്തകന് കരള്‍ പകുത്തുനല്‍കിയ സോമിച്ചന്‍ തോമസ് വട്ടപ്പാറ എന്നിവരെ അനുമോദിച്ചു. ജെസിഐ ലീജിയന്‍ പ്രസിഡന്റ് അജിമോന്‍ കെ വര്‍ഗ്ഗീസ് അധ്യക്ഷനായി. നാഷണല്‍ കോ ഓര്‍ഡിനേറ്റര്‍ അഡ്വ. ജയന്‍ ജോസഫ്, ഭാരവാഹികളായ ടി എസ് ലാലു, വി ഡി ജോയി, ചെറിയാന്‍ വെണ്‍മേലില്‍, രാജശേഖരന്‍ നായര്‍, ജോയി ഇരുമേട എന്നിവര്‍ സംസാരിച്ചു.
What's Your Reaction?
