ഇടുക്കി: വാത്തികുടി പഞ്ചായത്തിലെ പ്രധാന ടൗണായ തോപ്രാംകുടിയില്‍ അപകടാവസ്ഥയിലായ ആല്‍മരത്തിന്റെ ശിഖരങ്ങള്‍ മുറിച്ചുനീക്കി. വ്യാപാരികളുടെയും നാട്ടുകാരുടെയും നിരന്തര പരാതിയെ തുടര്‍ന്നാണ് ശിഖരങ്ങള്‍ മുറിച്ചുമാറ്റിയത്. മരത്തിനുസമീപം എപ്പോഴും ആളുകള്‍ കൂട്ടംകൂടി നില്‍ക്കുന്നത് പതിവാണ്. കൂടാതെ കട്ടപ്പന, തങ്കമണി ഭാഗത്തേക്ക് പോകേണ്ട യാത്രക്കാര്‍ ബസ് കാത്തിരിക്കുന്നതും ഈ മരത്തിന്റെ ചുവട്ടിലാണ്. മരത്തിന്റെ ശിഖരങ്ങള്‍ക്കടിയിലൂടെ ത്രീ ഫേസ് വൈദ്യുതി ലൈനും കടന്നു പോകുന്നുണ്ട്. ശിഖരങ്ങള്‍ ഒടിഞ്ഞുവീണാല്‍ നിരവധി വൈദ്യുതി തൂണുകള്‍ക്കും വ്യാപാരസ്ഥാപനങ്ങള്‍ക്കും കേടുപാടുകള്‍ സംഭവിക്കാന്‍ സാധ്യതയുമുണ്ടായിരുന്നു. വാത്തിക്കുടി പഞ്ചായത്തിന്റെ ദുരന്ത നിവാരണ പ്രവര്‍ത്തനങ്ങളുടെ ഭാഗമായി പൊലീസിന്റെയും കെഎസ്ഇബിയുടെയും സഹായത്തോടെയാണ് പ്രവര്‍ത്തനങ്ങള്‍ നടത്തിയത്.