ഇടുക്കി: കനത്ത മഴയിലും തിരുവോണത്തെ വരവേല്‍ക്കുവാന്‍ നാടും നഗരവും ഉത്രാടപ്പാച്ചിലില്‍ അമര്‍ന്നു. രാവിലെ മുതല്‍ മഴ ആരംഭിച്ചെങ്കിലും മിക്ക ടൗണുകളിലും ആളുകളുടെ തിരക്കിന് കുറവില്ലായിരുന്നു. പക്ഷേ, പ്രതീക്ഷയ്ക്കൊത്ത രീതിയിലുള്ള കച്ചവടം നടന്നില്ലെന്നാണ് ഭൂരിഭാഗം വ്യാപാരികളും പറയുന്നത്. തിരുവോണം നാളായ ബുധനാഴ്ചയും  ജില്ലയില്‍ കനത്ത മഴ പെയ്യുമെന്നാണ് കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്. മഴ ശക്തമായത് ആഘോഷങ്ങളെയും അവസാന നിമിഷത്തെ വിപണനങ്ങളെയും ചെറിയ രീതിയില്‍ ബാധിച്ചിട്ടുണ്ട്.   പൊന്നോണത്തിന് ആവശ്യമായ വസ്ത്രങ്ങളും പച്ചക്കറികളും പൂക്കളും വാങ്ങാന്‍ ജനങ്ങള്‍ നഗരങ്ങളിലേക്ക് ഒഴുകിയെത്തി. മഴയെ അവഗണിച്ചും ഓണച്ചന്തകളിലും കടകളിലും വന്‍ ജനത്തിരക്കാണ് അനുഭവപ്പെട്ടത്.  ഉത്രാടരാത്രിയുടെ ആഘോഷങ്ങള്‍ക്കിടെ  എത്തിയ കാലാവസ്ഥാ മുന്നറിയിപ്പ് ജനങ്ങളെ ചെറിയ തോതില്‍ ആശങ്കയിലാഴ്ത്തിയിട്ടുണ്ട്. എങ്കിലും  എല്ലാ പ്രതികൂല സാഹചര്യങ്ങളെയും അതിജീവിച്ചു മലയാളികള്‍ ഒത്തൊരുമയോടെ തിരുവോണത്തെ വരവേല്‍ക്കാനുള്ള തയ്യാറെടുപ്പിലാണ്. പ്രകൃതിയുടെ ചെറിയ കരിമേഘങ്ങള്‍ക്കപ്പുറം സ്‌നേഹത്തിന്റെയും സന്തോഷത്തിന്റെയും പൊന്നോണം ആഘോഷിക്കാന്‍ നാടൊരുങ്ങിക്കഴിഞ്ഞു.