ഇടുക്കി: കാല്‍വരിമൗണ്ടിനുസമീപം വാഴവര ഏഴാംമൈലില്‍ സ്വകാര്യ ഫാമിലെ സ്വിമ്മിങ് പൂളില്‍ ദുരൂഹസാഹചര്യത്തില്‍ പൊള്ളലേറ്റ നിലയില്‍ കണ്ടെത്തിയ വീട്ടമ്മയുടെ മൃതദേഹം ശനിയാഴ്ച രാവിലെ ഇടുക്കി മെഡിക്കല്‍ കോളേജ് ആശുപത്രിയില്‍ പോസ്റ്റ്‌മോര്‍ട്ടം ചെയ്യും. കൂടാതെ, ഫോറന്‍സിക് വിഭാഗം ഇന്ന് കൂടുതല്‍ തെളിവെടുക്കും. വാഴവര മോര്‍പ്പാളയില്‍ എം ജെ എബ്രഹാമിന്റെ ഭാര്യ ജോയ്‌സിന്റെ(52) മൃതദേഹമാണ് വെള്ളിയാഴ്ച ഉച്ചയ്ക്ക് 1.30 ഓടെ കണ്ടെത്തിയത്. ഇവര്‍ താമസിച്ചിരുന്ന തറവാട് വീടിനുള്ളിലും തീപിടുത്തത്തിന്റെ അടയാളങ്ങളുണ്ട്. സംഭവത്തില്‍ ജോയ്‌സിന്റെ ഭര്‍ത്താവ് സംഭവത്തില്‍ ഭര്‍ത്താവ് എബ്രഹാം(ലാലിച്ചന്‍), ഇയാളുടെ അനുജന്‍ ഷിബുവിന്റെ ഭാര്യ ഡയാന എന്നിവരെ പൊലീസ് ചോദ്യം ചെയ്തിരുന്നു.

വെള്ളിയാഴ്ച ഉച്ചയോടെ ഫാം സന്ദര്‍ശിക്കാനെത്തിയ പാലാ സ്വദേശികളാണ് മൃതദേഹം കണ്ടത്. ഈസമയം ഇവര്‍ക്കൊപ്പം ഡയാനയും ഒപ്പമുണ്ടായിരുന്നു. ഉടന്‍തന്നെ സമീപവാസികളെയും വിവരമറിയിച്ചു. കട്ടപ്പന ഡിവൈഎസ്പി വി എ നിഷാദ്‌മോന്റെ നേതൃത്വത്തില്‍ അന്വേഷണം പുരോഗമിക്കുകയാണ്.