ഇടുക്കി : വണ്ടിപ്പെരിയാർ പെരിയാർ ചോറ്റുപാറ കൈത്തോട്ടിൽ കക്കൂസ് മാലിന്യം തള്ളിയതായി പരാതി. രാത്രിയുടെ മറവിൽ ടാങ്കറിൽ എത്തിച്ചാണ് മാലിന്യം തോട്ടിലേക്ക് തള്ളിയത്. ചൊവ്വാഴ്ച്ച രാവിലെ 2 മണിയോടുകൂടിയാണ് സംഭവം. പ്രദേശത്ത് ദുർഗന്ധം വമിച്ചതിനെ തുടർന്ന് നടത്തിയ അന്വേഷണത്തിലാണ് കക്കൂസ് മാലിന്യം തോട്ടിൽ തള്ളിയിരിക്കുന്നതായി ശ്രദ്ധയിൽപ്പെട്ടത്.

പെരിയാർ ചോറ്റുപാറ കൈത്തോട്ടിലെ ജലം ഒഴുകിയെത്തുന്നത് പെരിയാർ നദിയിലേക്കാണ് കുടിവെള്ളക്ഷാമം രൂക്ഷമാകുന്ന  സാഹചര്യത്തിൽ വണ്ടിപ്പെരിയാർ മുതൽ അയ്യപ്പൻ കോവിൽ വരെ ഉള്ള എസ്റ്റേറ്റ് മേഖലകളിലും പുതുവൽ ഭാഗങ്ങളിലും പഞ്ചായത്തിന്റെ കുടിവെള്ള പദ്ധതിയിലും പെരിയാർ നദിയുടെ ജലമാണ് ഉപയോഗിക്കുന്നത്. അടിയന്തരമായി ഈ വിഷയത്തിൽ കുമളി,വണ്ടിപ്പെരിയാർ എന്നീ പഞ്ചായത്തുകളിലെ അധികാരികൾ ഇടപെടണമെന്നും രാത്രികാലങ്ങളിൽ പൊലീസ് പെട്രോളിങ് ഏർപ്പെടുത്തണമെന്നും നാട്ടുകാർ ആവശ്യപ്പെട്ടു.