ഇടുക്കി: വിവിധ ആവശ്യങ്ങള്‍ ഉന്നയിച്ച് സഹകരണ ജനാധിപത്യ വേദി 15ന് ജില്ലാ സഹകരണ ജോയിന്റ് രജിസ്ട്രാര്‍ ഓഫീസ് പടിക്കല്‍ ധര്‍ണ നടത്തും. കെപിസിസി രാഷ്ട്രീയകാര്യ സമിതിയംഗം ജോസഫ് വാഴക്കന്‍ ധര്‍ണാ സമരം ഉദ്ഘാടനം ചെയ്യും. കാര്‍ഷിക കടാശ്വാസ പദ്ധതിപ്രകാരം ജില്ലയിലെ സഹകരണ സംഘങ്ങള്‍ക്ക് നല്‍കാനുള്ള 110 കോടി രൂപ അടിയന്തരമായി വിതരണം ചെയ്യുക, സംസ്ഥാന സര്‍ക്കാരിന്റെ പ്രാഥമിക സഹകരണസംഘങ്ങളോടുള്ള രാഷ്ട്രീയ അനീതി അവസാനിപ്പിക്കുക, പ്രൈമറി സംഘങ്ങള്‍ സംസ്ഥാന സഹകരണ ബാങ്കില്‍ നിക്ഷേപിച്ച ഓഹരിത്തുക തിരികെനല്‍കുക തുടങ്ങിയ ആവശ്യങ്ങളുന്നയിച്ചാണ് സമരം. ില്ലാ ചെയര്‍മാന്‍ ജോയി തോമസ് അധ്യക്ഷനാകും. ഡിസിസി പ്രസിഡന്റ് സി പി മാത്യു മുഖ്യപ്രഭാഷണം നടത്തും. മുന്‍ എംഎല്‍എമാരായ ഇ.എം. ആഗസ്തി, എ.കെ. മണി, മുന്‍ ഡിസിസി പ്രസിഡന്റ് ഇബ്രാഹിംകുട്ടി കല്ലാര്‍, ജോയി വെട്ടിക്കുഴി തുടങ്ങിയവര്‍ സംസാരിക്കും. വാര്‍ത്താസമ്മേളനത്തില്‍ ജില്ലാ കണ്‍വീനര്‍ ഒ ആര്‍ ശശി, പി ആര്‍ സലിംകുമാര്‍, ജേക്കബ് പോള്‍, കെ പി അസീസ്, ഹാപ്പി കെ വര്‍ഗീസ് എന്നിവര്‍ പങ്കെടുത്തു.