ഇടുക്കി: ഫെബ്രുവരി മാസം പകുതിയായിട്ടും തണുപ്പ് വിട്ടുമാറാതെ മൂന്നാര്‍. സാധാരണ ജനുവരി അവസാന വാരമാകുമ്പോഴേക്കും മൂന്നാറിലെ അതിശൈത്യം കുറയുകയാണ് പതിവ്. എന്നാല്‍ ഇത്തവണ ഇപ്പോഴും മൂന്നാറിന്റെ പ്രഭാതങ്ങള്‍ ശൈത്യത്തിന്റെ പിടിയില്‍ തന്നെയാണ്. സഞ്ചാരികള്‍ക്ക് ഇത് ഏറെ സന്തോഷം പകരുന്നു. ഡിസംബര്‍ അവസാന വാരം മുതല്‍ മൂന്നാറിലെ അന്തരീക്ഷ താപനില താഴ്ന്ന് തുടങ്ങിയിരുന്നു. ചില ദിവസങ്ങളില്‍ താപനില പൂജ്യവും പൂജ്യത്തിന് താഴെയുമെത്തി. ചിലയിടങ്ങളില്‍ രാവിലെ മഞ്ഞുവീഴ്ച്ചയുമുണ്ടായി. ശൈത്യം വിട്ടുമാറാത്തത് സഞ്ചാരികള്‍ക്ക് ഏറെ സന്തോഷം പകരുന്നു. പകല്‍ സമയങ്ങളില്‍ ന്തരീക്ഷ താപനില ഉയരുമെങ്കിലും വൈകുന്നേരമാകുന്നതോടെ മൂന്നാറിന് മുകളില്‍ കുളിര് പുതയും. ഡിസംബര്‍, ജനുവരി മാസങ്ങളെ അപേക്ഷിച്ച് മൂന്നാറിലേക്ക് എത്തുന്ന സഞ്ചാരികളുടെ എണ്ണത്തിലും കുറവുണ്ട്. പരീക്ഷക്കാലമാകുന്നതോടെ മാര്‍ച്ച് മാസത്തില്‍ പൊതുവെ മൂന്നാറില്‍ സ്വദേശിയരായ സഞ്ചാരികളുടെ തിരക്ക് കുറവാണ്. മധ്യവേനലവധിക്കാലമാകുന്നതോടെ മൂന്നാര്‍ വീണ്ടും സഞ്ചാരികളാല്‍ നിറയും. നിലവില്‍ മൂന്നാറില്‍ നിന്നും അതിശൈത്യം പൂര്‍ണമായി വിട്ടുമാറാത്തത് മൂന്നാറിന്റെ വിനോദസഞ്ചാരമേഖലയ്ക്ക് ഗുണകരമാണ്. കഴിഞ്ഞ പത്ത് വര്‍ഷത്തിനിടയില്‍ മൂന്നാറില്‍ ആദ്യമായാണ് ഫെബ്രുവരി രണ്ടാംവാരത്തില്‍ താപനില മൈനസ് 1 രേഖപ്പെടുത്തിയത്.