ഇടുക്കി: പാമ്പാടുംചോല ദേശിയോദ്യാനത്തില്‍ വനംവകുപ്പ് നടപ്പിലാക്കുന്ന ട്രക്കിങ് സഞ്ചാരികള്‍ക്ക്  പ്രിയമേറുന്നു. പ്രകൃതിയുടെ വന്യത കണ്ടറിയുവാനാണ്  മൂന്നാര്‍ വന്യജീവി ഡിവിഷനും ഷോള നാഷണല്‍ പാര്‍ക്കും സഞ്ചാരികള്‍ക്കിവിടെ സൗകര്യം ഒരുക്കിയിട്ടുള്ളത്.
ഷോളാ നേച്ചര്‍ വാക്ക് എന്ന പേരിലുള്ള ട്രക്കിങ്ങ് സഞ്ചാരികളും  പ്രകൃതി സ്‌നേഹികളും ഇതിനോടകം ഏറ്റെടുത്ത് കഴിഞ്ഞു. പാമ്പാടുംചോല ദേശീയ ഉദ്യാനത്തിലെ ചരിത്രപ്രാധാന്യമുള്ള ഗ്രേറ്റ് എസ്‌കേപ്പ് റൂട്ടിലൂടെ നടക്കാനുള്ള സൗകര്യമാണ് ഷോളാനേച്ചര്‍ വാക്ക് എന്ന പേരില്‍ ഒരുക്കിയിരിക്കുന്നത്.  1942ല്‍ മദിരാശി പട്ടണത്തില്‍ ജപ്പാനിലെ നാവിക നൗകകള്‍ ബോംബ് വര്‍ഷിച്ചതിനെ  തുടര്‍ന്ന് ബ്രിട്ടീഷുകാര്‍ കൊച്ചിയില്‍ എത്തിച്ചേരുന്നതിനായി നിര്‍മിച്ച സമാന്തര പാതയാണിത്. കൊടൈക്കനാലിലെ ബെറീജത്തു നിന്ന് വട്ടവടയിലെ ടോപ് സ്റ്റേഷന്‍ വരെയുള്ള ഈ റോഡ് കടന്നു വരുന്ന ഭാഗം പിന്നീട്  കൊടൈക്കനാല്‍ സാങ്ഞ്ച്വറി ആയി പ്രഖ്യാപിച്ചതോടെ  തമിഴ്നാട് അതിര്‍ത്തിയില്‍ വനം വകുപ്പ് റോഡ് തടഞ്ഞു. അന്നു മുതല്‍ ഈ റോഡിലൂടെയുള്ള യാത്ര തടസപ്പെട്ടു. മൂന്നാറില്‍ നിന്ന് വട്ടവടയിലേക്കുപോകുന്ന പാതയില്‍ ടോപ്പ് സ്റ്റേഷന്‍ ചെക്ക് പോസ്റ്റില്‍നിന്നുമാണ് ഷോള നേച്ചര്‍ വാക്ക് ആരംഭിക്കുന്നത്. പോത്തിന്‍ങ്കണ്ടംവരെ നീളുന്ന യാത്ര കാട്ടുപോത്തുകളുടെ സമ്പന്നമായ കാഴ്ച സഞ്ചാരികള്‍ക്ക്  സമ്മാനിക്കും. ലോഗ് ഹൗസ്, അപൂര്‍വമായ നീലഗിരി മാര്‍ട്ടിന്‍, വിവിധയിനം പക്ഷികള്‍, മറ്റ് വന്യജീവികള്‍, അപൂര്‍വമായ മരപ്പന്നല്‍ തുടങ്ങിയ കാഴ്ചകളും കാണാന്‍ കഴിയും. രണ്ടു കാട്ടുചോലകള്‍ മരപ്പാലത്തില്‍ കൂടെ കടക്കുവാനും അവസരം ലഭിക്കുന്നു. പോകുന്ന വഴിയില്‍ സഞ്ചാരികള്‍ക്ക് ക്ഷീണമകറ്റുവാന്‍ വിശ്രമകേന്ദ്രങ്ങള്‍ ഉണ്ട്. അഞ്ചു കിലോമീറ്റര്‍ ദൂരമുള്ള ഷോല ട്രെക്കിംഗിന് 300 രൂപയാണ് നിരക്ക്. പ്രകൃതിയെ അടുത്തറിഞ്ഞുള്ള ഈ യാത്ര  സഞ്ചാരികളും  പ്രകൃതി സ്‌നേഹികളും ഇതിനോടകം ഏറ്റെടുത്ത് കഴിഞ്ഞു.