ഇടുക്കി: മറയൂര്‍ കാന്തല്ലൂരിലെ ജനവാസ മേഖലയില്‍ കൃഷിനാശം വരുത്തി കാട്ടാനക്കൂട്ടം. കാട്ടാനകളെ തുരത്താനുള്ള ശ്രമം കഴിഞ്ഞ ഏതാനും ദിവസങ്ങളായി തുടരുകയാണ്. വനപാലകരും ജന ജാഗ്രത സമിതി അംഗങ്ങളും വിവിധ സംഘങ്ങളായി തിരിഞ്ഞാണ് ആനകളെ തുരത്താനുള്ള ശ്രമം നടത്തുന്നത്. ജനവാസ മേഖലയില്‍ ഇറങ്ങി കാട്ടാനകള്‍ വ്യാപക നാശം വരുത്തുന്ന സാഹചര്യത്തിലാണ് നടപടി. പകല്‍ സമയങ്ങളില്‍ കൃഷിത്തോട്ടങ്ങള്‍ക്ക് സമീപം ഗ്രാന്റീസ് മരങ്ങള്‍ക്കിടയില്‍ തമ്പടിക്കുന്ന കാട്ടാനകള്‍ രാത്രിയാകുന്നതോടെ കൃഷിസ്ഥലങ്ങളില്‍ ഇറങ്ങി കൃഷി നശിപ്പിക്കുന്നത് കര്‍ഷകര്‍ക്ക് വലിയ വെല്ലുവിളിയാണ് ഉയര്‍ത്തുന്നത്. ആനകളെ പൂര്‍ണമായി ജനവാസ മേഖലയില്‍ നിന്ന് തുരത്തി കര്‍ഷകരുടെ ആശങ്കയകറ്റാനുള്ള ശ്രമമാണ് നടക്കുന്നത്.